Placi Biscuolm 1851 a Sedrun
Ils 12 da fevrer dat il sulegl per l'emprema ga en stiva da scola ed ella stiva speras en dallas finiastras sura. Il sulegl va giu ussa pér allas quater dalla sera, quei ei ils 12 da quest e leva ¾ sillas otg dalla damaun. En stiva encunter damaun dat il sulegl per l'emprema ga ils 16 da fevrer e stat schon in quart ura il di.

Pader Baseli Berther, Rueras/Dieni
Entuorn 1860 era ei aunc gronda munconza da scolasts. Professer Placi Condrau era inspectur. Rudolf Cavelti veva fatg la scola primara a Sagogn. Condrau ei vegnius sin inspecziun leu e viu che Cavelti saveva stupent sias caussas e scret igl atun ad el da vegnir a Sedrun e surprender la scola pintga. Ed el ei vegnius a Sedrun sco scolast cun 15 onns, senza negina preparaziun. Plevon Durgiai ha lu presentau Rudolf Cavelti a Lucas Cavegn e lez ha detg: "Quel bettan ei del Run giu!" - Denton veva lunsch entuorn buc in soli scolast quei uorden e quella disciplina sco Rudolf Cavelti! - Siu salari fuva 120 frs. Nua prender cuost per ch'ei tonschi? Ei han cussegliau ad el d’ir en casa dalla caplania e far sez il percasa; han mess en in letg e dau in per cazzettas ad el. "Jeu survegnevel fetg bia dils purs", raubas da cuschinar etc.. Suenter scola metteva Rudolf Cavelti si scussal e fageva il percasa: pulenta, broda, suppa da frina ... Era ils ses tarmettevan si dabia da casa. Il mender era che negin lavava siu resti; siu scussal era tschufs e tut steris dil cut!
Rudolf Cavelti era staus pladius per la scola pintga, mo ha lu dau la gronda a Sedrun. Vegneva ora fetg bein cul sur plevon: la sera era el quasi adina si tier lez - per spargnar la cazzola! Alla fin da quei emprem onn da scola ha professer Placi Condrau giu detg: "Cavelti ei ualti nauschs en scola!"
L’auter onn va Rudolf Cavelti scolast a Selva per 150 frs. Leu ha el fatg scola en ina casa sper la caplutta, casa dubla dils Flurins, ella stiva encunter la caplutta: cuschina davos mun e combra da maner cun tgaminada. El stueva era scaldar pegna per la scola - cun caglias striauna. La sera fuv'el adina si tier pader Sigisbert Monn, um fetg serius, che sunava fetg bein clavazin e mussava gronda simpatia per la claustra! - Fetg bien fageva la famiglia Venzin cun el. L’Onna Rosa Martina Venzin ha schizun gidau el pli tard a schar studegiar! - Il secund unviern a Selva ha ei dau massa neiv. Vegniu giu la lavina da Rusas e Rudolf Cavelti ha stuiu far tunnels per che ses affons sappien vegnir a scola.
A Selva fageva el mai caffe, el bueva adina latg mulsch; insumma pintgas u neginas expensas. El ha tarmess l'entira paga a casa! Perquei veva Lucas Cavegn, commember dil cussegl da scola, giu detg: "Quels tg'on nuet, tarmettan la paja a tgèsa: quels tg'on enzatgei fon se daivets!"
Ils scolasts da Tujetsch mavan adina a conferenza. Quella veva liug il bia a Mustér ella "Cruna". Quei eri dis da biala poesia e da pign cuost. Caffe cumplet tiella "Veva" per 60 raps e pil "surmeister pign" custav'ei aunc meins!
"Leger stuevan mes scolars fetg bia. Buca bustabiar pli; nus vevan la Fibla. Gruppas da plaids; alla fin adina "vianter" e "costas". - Jeu vevel dus differents cudischs da scola cun lien differentas caussas zun capeivlas. Las classas superiuras havevan il cudisch da professer Placi Condrau. Il principal era denton la "bibla", il scriver ed il quen.

Fidel Caderas da Ladir
Jeu hai entschiet a far scola a Sedrun 1859/60 e teniu ora quitordisch unviarns. Per tut ils affons hai jeu fatg scola - sch'jeu sbagliel buc - ils otg davos unviarns; las notizias ch'jeu vevel giu scret da lezzas uras davart la scola a Tujetsch ein barschadas. Sper la scola superiura, fuv'ei ina scola inferiura, tenida 1859/60 da Tumaisch Jacomet; 1861/62 da Rudolf Cavelti, ussa canoni a Cuera; 1862/65 da Lucas Cavegn da Rueras. Suenter vegneva teniu a Sedrun sper la scola elementara ina scola tudestga per tgi che leva, mo quella era buca obligatorica. Quell'ei vegnida tenida da scolast Gion Antoni Soliva e dils caplons sur Casanova e sur Tuor. Avon che jeu vegni a Sedrun veva Gion Antoni Soliva quella scola e suenter mei scolasta Onna Maria Deplazes. - Jeu hai entschiet a far scola a Sedrun cun 200 frs. - l'aulta paga da quei temps. La mesadad, 100 frs., pagavel jeu pil cuost. Suenter han ins lu, empau per onn, alzau entochen sin 300 frs.
Malcuntentientscha regeva a Tujetsch, cura che jeu sundel vegnius leu, pervia dils fondos da scola, ils quals la vischnaunca veva priu e pagava als divers vischinadis, tenor scolas e diember d'affons; e quei ei era stau il motiv da duas scolas a Sedrun. Camischolas ha eregiu ina scola mo per buca stuer schar vegnir ora a Sedrun e collectau per in agen fondo da scola etc.
Signur Bernhard, president dil cussegl d'educaziun cantunal da lu, ha cun caschun ch'el haveva visitau la scola claustrala, era visitau las scolas da Sedrun e dau a quellas grond laud, cunzun alla romontscha, specialmein el quen.
Diesch onns, unviarns, hai jeu, ultra dalla scola dil di, era dau scola la sera, a pigns e gronds. -
Da quei temps schavan ins buca scriver cun plemas d'itschal! Dallas dudisch all'ina vevel jeu adina da tagliar ora plemas. Ins haveva lu era negins carnets da quen. Mintga damaun avon scola stuevel jeu scriver quels sin las tablas grondas per mintga classa. Havevel perquei mez cumponiu pensums per mintga classa. Hai fatg biaras translaziuns per auters scolasts che savevan buca tudestg, e quasi mintg'onn purtau in referat sin ina u l'autra conferenza scolastica. Visitavel era bugen las scolas dils auters scolasts.
Miu emprem inspectur ei stau professer Placi Condrau, staus miu professer a Mustér; suenter sur canoni Huonder, medemamein miu professer a Mustér ed era il sur Maurus Desax, plevon a Sedrun da quei temps e lu Gion Mathias Pfister da Schlans, staus miu scolar a Schlans, nua che jeu hai entschiet a far scola.

Maria Caplazi
Da 1873 - 74 entochen 1879/80, siat unviarns, hai jeu fatg scola a Sedrun; igl unviern 1881 a Camischolas, sperond che lezza pli leva lavur cun 23 scolars, seigi pli favoreivla per mia sanadad.
Il diember da scolars a Sedrun variava denter 50 - 60; in onn 61 ed in onn 48, reparti sin siat classas. L'instrucziun ed educaziun da quels carezai affons cun aschi promta obedientscha e sutmissiun, zun attaschai e dalla pli buna veglia enten suandar admoniziuns, cussegls e giavischs, era miu grond legherment. Favori intragliauter cun talents mesauns, han ei levgiau mia lavur, gidau suenter mia inhabilitad entras ualti general buna diligenza, premurada activitad en scola ed a casa. La pli gronda indulgenza e toleranza han tuts cars, buntadeivels cooperaturs dalla scola demussau a mias biaras munconzas e mendas.
Igl emprem onn hai jeu giu 400 frs. pagaglia, ils quater suandonts 500 frs. ed ils dus davos onns aunc habitaziun e lenna tiels 500 frs. Il local da scola era en casa da caplania; per la numerusa populaziun ina stiva bassa, pintga e stgira. Laschond il ludeivel cussegl d'educaziun miserar in onn ils locals da scola e prescrivend el 4,5 qm3 plaz per affon, ha ei resultau ch'ils mes vevan mo 0,8 qm3 plaz.
Miu antecessur ei signur scolast Fidel Caderas da Ladir staus, miu successur scolast Anselm Capeder, avon a Camischolas. Sch'jeu seregordel endretg, ha era Camischolas pagau mia lavur cun 430 frs. Lezs affons, meins occupai a casa, han demussau cun pintga excepziun ina nunstunclenteivla activitad e diligenza. - A Cavorgia hai jeu fatg scola ils treis unviarns 1898/99 e 1900 cun otg, siat e sis scolars pulit talentai e zun diligents, mo pauc sviluppai, per gl'auter denton oreifer buns affons."
Cert, ei ha dau en tuts onns bia anecdotas da rir, mo sai jeu oz buca pli seregurdar da tuttas aschibein e co ellas ein seconstituidas. - D'ina tscheivrila recreaziun sai jeu far menziun .... Havend il ludeivel cussegl da scola, sco era buns geniturs lubiu in communabel divertiment, havein uns seprofitau da quella lubientscha per gliendisdis-tscheiver. Suenter messa ein tuts scolars vegni en scola, per spitgar ils associai da tscheiver: revendissims signurs, farrer Desax e caplon sur Augustin, cussegl da scola, plirs babs e president communal Luregn Jacumet. Cantau ina canzun sil plaz, ei la cumpignia semessa sin viadi a Rueras, cantond e giubilond e menada dils dus pli pigns scolars sco capitani e portabandiera. A Rueras essan nus sereuni en baselgia e cantau ina canzun. Sin nies retuorn fatg il medem a Zarcuns ed a Camischolas. Ils vischins da scadin liug ein separticipai da quella affonila legria, sepustond sin finiastra, sper via per veser ed udir la legra societad. Arrivai a Sedrun circa allas 12, han 2 - 3 siets da buis beneventau la cumpignia. Spir appetit essan nus i ella Cruna per satisfar a quel cun in bien refrestg. Duront quel ein ils affons sediverti cun cantar e declamar. In pulit diember da vischins formavan igl auditori. Memia gleiti eis ei stau sera e la legra societad ha stuiu sesparter e sespatitschar.
In onn hai jeu giu in principiant, paupers da talent, e quel hai jeu ditg buca saviu perschuader da far scriver - ord spir buna fei. Aschigleiti che jeu bandunavel el, metteva el greffel e tabla d'in maun, mo steva tut ruasseivels e quiets. Dumandond pertgei el scrivi buc, ei la risposta stada: "Ju stu fa scu la “schulmeistra”, lezza scriva era bètg!
Screttas ils 24 da december 1901.


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img06.jpg