Scolast SolivaNotizias dil vegl scolast Gion Antoni Soliva (1832 - 1915) da Sedrun
Dil temps denter 1840 e 1850 vegneva clamau giud scantschala la dumengia avon s. Catrina (25-11), che la scola vegni da quei temps entschevida e cuntinuada tochen la jamna sontga. El medem temps recumandava il sur plevon da vuler tarmetter ils affons sauns e tafers dad otg onns vegliadetgna tochen ils da dudisch onns inclusiv, “flissiamein” a scola. - Quei daventava aber sut negin castitg e controlla. 

Ils anno 1840 tochen 1845, che jeu mavel a scola, deva il sur Giachen Martin Camenisch, caplon a Sedrun, scola als pigns digl ABC en sia casa privata. (Quei era la casa dil Muggli Grond, plitard Hotel Alpsu.) - Als auters affons che savevan ina gada leger deva il sur plevon, decan Giusep Antoni Hetz, scola en sia casa pervenda. A Rueras deva il sur beneficiat sur Vigeli Venzin da Gonda scola ed a Selva ha il sur beneficiat sur Gion Giusep Deplaz dau tochen anno 1850 era en casa pervenda, ton sco jeu saiel. - Naven dils anno 1845 tochen ils 1849 ha Stiafen Monn dau scola a Sedrun en sia atgna casa.
Cudischs da scola eran:

1. In sempel ABC.

2. Suenter quel il sempel cudisch dil cuntegn da cuortas fablas e praulas.

3. In cudisch pli volum, cuntenent enqual descripziun dalla natira ed enqual raquintaziun ord il temps vargau, che vegneva numnaus "il cudisch da steilas", sco era il cudisch dil Veder Testament".

4. Il cudisch d'uffeci latin ed il cudisch da ductrina. En quels vegneva legiu ed enqual caussa empriu a memoria e raquintau.

El scriver: concepts negins, mobein exercezis ella calligrafia. A mintga scolar scriveva igl instructer sez sisum in fegl pupi ina lingia e suenter quella haveva il scolar da scriver igl entir fegl schi bein sco'l saveva.
El quen vegneva mussau successivamein las quater specias cun special risguard e far quen cun renschs, rizzers e bluzchers; mo quei naturalmein, quellas quater specias, senza risguard sin quens pratics per la veta. Quen a tgau negin exercezi.
Arisguard las absenzas dils affons da scola duront il temps da scola, vegneva teniu negina controlla.

La disciplina era empau munglusa, malgrad ch'ils affons eran bein sensibels e beinduras empau da scharfs (tazzas cun ina gronda e ferma lingiala treis e quater en ina gada; star mesas uras enschanuglias cun bratscha aviarta e lu aunc beinduras sin in plèder git).
Duront scola vegneva bein savens scumandau scadin tschintschar denter ils scolars ed era buca mirar ord il cudisch. Per quei intent metteva il scolast secretamein in scolar sco survigilader e tgisader da quels, mo quei tgisader ch'era il bia gia enconuschents als affons da scola, vegneva ord scola hassiaus e persequitaus da tuts affons da scola, en particular da quels che tal tgisava al scolast. In relavont spért e “fliss” fuva tiels scolars gronds che scrivevan sin pupi, il scolast metteva giu ils scolars ina ga per meins en retscha cun nr. 1, 2, 3 ed aschia vinavon, secund sco lur scartiras eran bein ni malfatgas.


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0347.jpg