Notizias davart la scola da Rueras 1804 – 1850

En ina brev dils 20 d'uost 1804 scretta agl uestg da Cuera dil "statthalter Ulrich Venzin, Deputierte und Johannes Gieriet Landa. Deputierte", supplicheschan els ch'igl uestg duessi dar uorden ch'il caplon legi mintgadi messa a Rueras .....
.. und das der Capellan in winterzeit kein anlas habe die schuol zu unterlassen, und also die jugend mehr unterwiesen werde ...

Igl uestg ha correspondiu al giavisch dils da Rueras, tenor brev da sur plevon Josef Schmidt, (Chur, den 4. Jäner 1806) e concernent "officia generalia" dueigien era ils da Selva guder quei privilegi, sinaquei che “die Schul nicht zu oft versäumt werden müsste.”

Anno 1811 dat ei novas, ch'il caplon da Rueras hagi da far scola, ni d'haver quitau che zatgi fetschi:
.... Doch soll die Gemeinde ... falls kein Caplan daselbst wäre, um einen anderen Schulmeister umzusehen gehalten werden. –
Chur, den 23. April 1811 - Carl Rudolph de Buol. Episc. Cur.
(Ord Decretum novum, p. 14. 57)

Cul temps mav'ei lu tuttina buca pli da pagar il caplon mo cun "vaultas lenna", perquei il suandont conclus che fa honur als da Rueras:
Igl onn 1837, ils 19 da mars a Rueras, ha in ludeivel vischinadi en preschientscha da segnerfarrer e caplon concludiu unitamein da far aunc per sis onns, ch’han da vegnir, igl uffeci da caluster en roda ed applicar il vanzament dall’entrada vid la scola u vid baghetgs ni cudischs, ni salari dil “Schulmeister”, suenter sco ina cumissiun tratga ora dil vischinadi anfla per bien, la quala duei ses projects a quel metter avon e sco'l vischinadi approbescha duei el ver valur, tonaton adina per nez dalla scola.
Christ Venzin p. t. gerau.
(Urbari da Rueras)

Notizias ord la cronica da Rueras, che pertuccan la scola veglia.
Cronica da Rueras scretta da Giachen Antoni Venzin (1839 - 1918) da Rueras, sin fundament dalla tradiziun dalla fin dil 18avel tschentaner.

Dapi da vegl enneu ha la scola da Rueras entschiet sut sur Vigeli Venzin. Quel ei staus caplon a Rueras varga 40 onns. Gl'unviern devi el scola sut la medema taxa da 30 renschs (51 frs.). Quei sur caplon ha baghegiau la casa sper baselgia ch'auda a Gion Mathias Monn. El hagi baghegiau quella per spargnar la lenna (leugiu duvrava el duas pegnas), la quala el procurava sez. Ils vischins stuevan dar ina vaulta lenna ni miez rensch. - En quella hagi el dau biars onns scola. Ei vegneva mussau empau da leger e scriver ed il quen; las quater specias. Allas buobas vegnev'ei mussau plitost mo da leger. Ils davos onns, nua ch'el era vegnius empau fleivels, ha Gion Fidel Berther (cantadur) surpriu da dar scola. Quel mussavi da scriver ils bustabs gronds avon ch'ils pigns. Il sur decan Hetz hagi ina gada visitau la scola sut quel ed hagi detg ch'ins stoppi mussar ils pigns avon ils gronds. - Suenter ha assistent Muggli fatg scola in unviern en la stiva da Gion Ludivic Pally (nossa casa, stiva dadens). Suenter ha pader Martin Andreoli fatg la scola en la casa pervenda aschiditg ch'el ei staus caplon leu; e lura sur Lorenz Riedi, era en casa pervenda, e siu vegnentsuenter ei stau sur Bistgaun Beer. La taxa dalla paga era da quels sura scolasts (caplons) 80 renschs, entochen 1850 ....


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img01.jpg