Contract dil cussegl da scola fatgs cun scolast Placi Bisquolm, il settember 1849

Denter ils suttascrets, numnadamein, il president e cussegl da scola dalla ludeivla vischnaunca da Tujetsch d'ina vart e scolast Placidus A. Bisquolm da Sumvitg da l' autra vart, ei sil di dad oz serrau giu in'entelgientscha ed accord sur dil schar far e sur dil surprender ina scola ella vischnaunca e vitg Sedrun, e zuar sco suonda:

1. Surpren scolast Placi Bisquolm da far scola el sura predetg vitg e vischnaunca ad in diember da 50 - 70 affons senza in auter agid.

2. Da dar instrucziun als mats (giuvens carschi) in miez di per jamna.

3. D'instruir ina u duas gadas per jamna e zuar la sera duront igl unviern el cant per la baselgia.

4. Da tener scola duront treis onns ella sura vischnaunca e vitg; diesch meins per onn entochen sis uras da lecziun per di.

5. Tuttas dumengias, fiastas e firaus cumandai, sco era in auter miezdi (sco per vacanza dalla jamna) ein exceptuai da far scola.

6. Per indemnisaziun per la sura instrucziun, paga e s'oblighescha il cussegl da scola annualmein al scolast Placi Bisquolm:
a. 350 fl. scrivel treitschien e tschunconta renschs.
b. Loschament - loschi en casa da scola e lenna da cuschinar.
c. D’esser libers da tuttas lavurs ed expensas communalas.

7. Ils dus meins da vacanza vegnan reparti sin ina vacanza dalla primavera ed ina digl atun. Il con ditg per liug, sco era cura ch'ella entscheiva e finescha, vegn mintga gada destinau e s’entelgiu dil cussegl da scola e dil «Lehrer».

8. Sur dils materials, ch'ein da duvrar tiellas lecziuns en scola, sur dils cons dils objects e con lunsch quels dueien vegnir doci, duei adina vegnir s'entelgiu denter il cussegl da scola ed il scolast.

9. Tuts cass da malentelgientscha denter las parts pervia da quest accord, dueien, buca savend vegnir perina denter ellas, vegnir fatgs ora definitivamein mo entras il signur inspectur da scola da nies district.

10. Sur dalla sura entelgientscha ei vegniu scret dus medems plidonts originals, da medema scartira e maun, e da mintga part dau in, suttascrets dallas parts cun agen maun.

Il cussegl da scola, en num da quel
Johan Jacob Beer
Placidus Bisquolm, Lehrer.

Tujetsch, ils 23 da settember 1849.


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0347.jpg