Brev dalla cumissiun da scola dil cumin dalla Cadi - 1841

Mustér, igl 1. da december 1841

Havend la cumissiun da scola dil ludeivel Cumin dalla Cadi sil sura di teniu conferenza cun ils signurs geraus dalla ludeivla vischnaunca da Tujetsch e vesend ord informaziuns dadas dils medems signurs geraus, d’ina vart ils gronds basegns da promover il megliurament dallas scolas leu schon existentas, sco era da l’autra vart las abuldontas resursas pecuniaras da quella vischnaunca, sche ha la cumissiun da scola invitau ed incumbensau ils respectivs signurs geraus da tener en lur vischnaunca conferenza cul revendissim signur farrer ed auters amitgs da scola per seconsultar:

a) Sch’ei seigi necessari da fundar, aschibein a Sedrun sco era a Rueras, meglieras scolas, ni sch’ei seigi forsa avunda da promover ina scola centrala en in liug plascheivel alla vischnaunca, laschond a mintga liug las scolas presentamein existentas cun la pli necessaria refuorma.

b) Sche la vischnaunca fuss cuntenza da, cun cunsentiment digl ordinariat, prender ord las rehas capluttas dalla farria il superfluum (differenza) per vegnir tier las necessarias fundaziuns, sco era per baghegiar els dus menziunai loghens casas da scola.

c) Sch’ils beneficiats, che han l’obligaziun da far scola, fussien cuntents da contribuir in ton tier il salari per las scolas, sedeliberond els cheutras dalla sura grevezia.

d) Sch’ei fussi forsa d’anflar auters avantatgs, sco per exempel a Rueras entras unir la scola cun la calustria, per cheutras vegnir ton pli tgunsch tier la necessaria fundaziun.

La cumissiun da scola viva dalla dultscha speronza, ch’il signur farrer dil liug, ensemen culs respectivs signurs geraus ed auters buns amitgs da scola, vegnien en buna entelgientscha ed accord ton per in liug sco per l’auter, secund lur meglier saver e puder, promover il megliurament dallas scolas da lur vischnaunca.
Vegnend la vischnaunca da Tujetsch suenter a quei senza dubi gest e sogn desideri d’in ludeivel magistrat ed en particular dil cussegl d’educaziun, sche pudein nus era certificar quella, ch’ella vegni secund ils progress era contonscher ils commensurai premis ord la cassa cantunala.
Serecamondan alla buna vulientscha d’ina ludeivla vischnaunca, ils suttascrets
Paulus Benedictus Berther, farrer
Al. la Tour
F. Cabernard

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img02.jpg