1861 – Project tier ina cunvenziun pervia dall’alimentaziun dallas scolas da Tujetsch

Sin ordinaziun dil ludeivel cussegl d’educaziun, che veva udiu ch’ei seigi rut ora ella vischnaunca da Tujetsch discordia pervia dallas scolas, ei igl inspectur da scola serendius leu, ha dumandau sclariment sulla vertenta questiun tiel presidi da vischnaunca e dil cussegl da scola, ed ha lu suenter haver giu conferiu culs dus representants dil vischinadi da Camischolas, teniu ina deliberaziun cun quels quater signurs, co ins savessi pigl avegnir alimentar lur scolas. Suenter haver ponderau la caussa madiramein, han ins lura per promoziun dall’educaziun dils affons e per manteniment da pasch e concordia denter ils differents vischinadis, concludiu da proponer alla cumissiun da scola ed alla vischnaunca sequents statuts:

1. In communal cussegl da scola ha da direger tuttas sis scolas, quellas duas a Sedrun, quellas da Camischolas, Rueras, Selva e Cavorgia e d’haver quitau ch’ellas survegnien qualificai instruiders.

2. Essend ch’il fondo da scola tonscha per lunsch buc ora da salarisar quels sis scolasts, sch’eis ei absolut necessari che la vischnaunca contribueschi pella salarisaziun da quels annual ina sufficienta quota. Patertgond suenter nua recavar quels mettels, han ins unitamein anflau ch’ei fussi nuot auter che gest e dueivel, ch’igl arvè da 180 frs. che la vischnaunca paga annualmein ord sia cassa alla venerabla claustra, duessi puspei sco vivon vegnir mess sils tiers che gaudan quellas alps e las pastiras. Perquei benefeci, che carschess cheutras alla cassa da vischnaunca, dueigi quella mintg’onn pagar alla scola 350 frs.

3. La rendita dil fondo e quella contribuziun da 350 frs. dueigi per la mesadad vegnir repartida sils scolasts ulivamein e l’autra mesadad tenor il diember d’affons che visetan quellas scolas, aschia che la mesadad vegn repartida sils affons da scola e che quellas ch’han ils biars affons survegnan era il bia. Da quintar quell’entrada da scola sin 900 frs. tuccass ei 75 frs. per scolast e 3.25 frs. circa per affon. Aschia survegness Sedrun circa 338 frs., Camischolas 124 frs., Rueras 162 fr., Selva 153 frs. e Cavorgia 114 frs.