1806
Ils 19 da fevrer 1806, mesjamna dalla tschendra, ei la lavina vegnida giu dalla Val da Plaun (sur Selva) entuorn l’ina dil di ed ei ida cun ina casa dubla gronda, nua che la glieud eran per ventira fugi ual avon pign mument. Era in clavau dador baselgia cun enzacons tiers manedels ei vegnius sfraccaus ensemen; cun ils tiers gronds fuvan ins untgi ora il di avon.

1808
Ils 12 sils 13 da december 1808 destruescha ina lavina la gronda part dil vitg da Selva; 42 persunas ein vegnidas satradas e 25 han anflau la mort, 17 dels perencunter ein vegni spindrai. Text sur dalla lavina en Selva avon 100 onns da pader Baseli Berther.

1808
Zu eben dieser Zeit [Dezember 1808] riß sich eine Lauine unter dem Berg Quolm de Vi ob Salins im Tavetscherthal los und überstürzte in Valtgerva (Valtgeva) 7 mit Futter angefüllte Viehställe, wo nie Lauinen zu begegnen pflegten. Unweit dieser Gegend brachen zwey andere Schneelauinen los: die einte riß in Sedrun, im Hauptorte Tavetsch's, ein Haus ein, und die andere deckte einen Stall und eine Schmidte [Schmiede] zu. Auch diese Lauine war unerhört. Ms. Pl Sp 8.

1809
Il schaner ein dus umens vegni satrai dalla lavina dador il vitg da Selva.

Disgrazias senza datums precis
In cert Rest Riedi ei vegnius per la veta dador Selva entras in crap ruclont. - In Balzer Riedi ei daventaus l’unfrenda d’in squatsch lavina ed ha anflau la mort ella Bullatscha. -  Schnoz cun aunc in auter ein vegni ella lavina dadens Carmihut. Lur baras han ins anflau per la primavera. - In Barclamiu Berther ei ruclaus ellas Vals cun encurir ses tiers, in Curschellas dad ir per cristallas.

1810
Daniev 1810. La lavina dils Tschenghels da Rusas e quella dalla Val Ruinatsch destrueschan ina casa a Selva. Pader Placi a Spescha rapporta: «Igl onn 1809 ils 31 da december ei stau ina notg ed in di da tema e da horrur per Selva. La cufla ha entschiet la sera avon da haregiar, cuflau tutta notg ed entuorn las tschun dalla damaun vegn la lavina da Tschenghels da Rusas e rumpa en la casa entadem il vitg, la preit sisum da quella dil maun dadens ed igl esch dado da tschaler ed emplenescha en cun neiv. Sut casa ein dus clavaus fretgi en, rut portas e lenna ed empleniu en cun neiv, ed il tierz fretgs encunter cun neiv. Sur la casa dalla pervenda ora ei ida la lavina tgulond e saccudend la casa. Suenter messa gronda, allas dudisch, duront ch’ils umens da Tschamut eran en casa pervenda per prender resti dil beneficiat dad ir a Tschamut, vegn la lavina dil Ruinatsch, siglent’en las finiastras dalla casa ora giudem dil vitg sut il clavau dalla pervenda e dadens dus eschs nuegl. Tschella lavina bett’en ina talina e questa in chischner e spuorla sin las finiastras dalla casa dalla pervenda bien e ferm e stgira la stiva.» – Quella notizia sesanfla egl urbari da Selva ed ei suttascretta: «Pader Placi, viu cun mes agens egls. Hai scret e sun serendius a Tschamut aunc quei medem di

1811
Ils 25 d'avrel, returnond Maria Barla Monn en da Mustér, eis ella dada sur in piogn giu el Rein. Perveseders han anflau ella l'auter di o l'Acla e tratg ella ord l'aua.

1812
Ils 7 da settember ei Giusep Antoni Giossi ruclaus da far fein a pastg silla Plaunca Droz (da Rots) (Val Bugnei) e vulend alzar si eis el morts.

1816
Ils 24 da settember ei Vigell Liberat Monn serendius da notg ord tegia dil Cuolm da Vi e curdaus sur in precipezi giu el Drun da Bugnei e staus morts.

1816
Igl onn senza stad. Mira: 1816/17 Onn senza stad - onn dalla fom.

1817
Epidemia a Selva, bia morts en consequenza digl onn 1816, quel senza sulegl ed igl onn 1817, igl onn dalla fom.

1817
Ils 6 da mars, la sera allas 8, ei la secunda gronda lavina da Rueras vegnida a val. En quella han 28 persunas anflau la mort, 19 autras han ins pudiu spindrar.

1817
Ils 28 da mars han ins anflau Vigeli Giusep Riedi, returnaus dad Ursera, schelaus sil Cuolm d'Ursera.

1817
Onn dalla fom cun gronda miseria. Mira: 1816/17 Onn senza stad - onn dalla fom.

1821
Ils 12 da settember ei Vigeli Giusep de Florin vegnius per la veta cun far fein a pastg el Baun Tschinglatsch.

1822
Per il di da sogn Placi, ils 11 da fenadur, ei igl entir vitg da Camischolas barschaus giu. Duas persunas ein daventadas las unfrendas dallas flommas: Onna Maria de Pally e Maria Liberata Rothmund, ina mattatscha da 7 onns.

1822,
den 11. des Heumonats als die meisten Einwohner bei der Feier in Disentis und die andern in den Alpen waren und im Ort nur drei Männer, ein Mann ohne Pfarrer und Kaplan, brannte das Dorf Camischolas im Tawätscher-Tal ab. Es bestund aus 15 Häusern, und ungefähr ebensoviel 16 Heuscheunen, in allem 31/29 Gebäude, und die mit heu angefüllt waren. Die schöne Kapelle St. Sanna ging zugleich im Rauch auf, und von ihre konnte das gerettet werden, was die Anstrengungen des H. Pfarrers Joseph Hiz, und des Herrn Kaplans in Rueras Vigili Venzin vermochten. Man bedauert dabei bei fünf schhön von Holz gebauten Häuser, die mit Nageldach versehen waren. – Dieses ist allenhalben ein Feuer- und Hageljahr.
P. Placi a Spescha, scartira nr. 178 – 180

1829
Ils 23 d'uost ei il nurser Rest Valentin Beer da Camischolas daus sur in precipezi giu silla "Puzza", els Neidis, e staus morts.

1833
Ils 6 da mars ei Gion Rest Monn da 17 onns vegnius en in squatsch lavina ella Val da Claus e restaus morts.

1834
Ils 22 da zercladur ei il mattatsch da 15 onns, Rest Giusep Riedi, daus en in vadretg ellas Vals e vegnius anflaus morts suenter 4 dis buca dalunsch dil liug dalla disgrazia.

1836
Vigelgia da Nadal. La sera, circa allas quater, ein statalter Giachen Antoni Monn da Zarcuns e Sep Lurenz Schmed da Rueras vegni ella lavina a Giuv, ferton ch'els pervesevan. L'auter di ein els vegni cavai ora morts. Aunc quater auters perveseders ein vegni quei di ella lavina, ein denton mitschai cun la veta.
"Ei vegn detg ch'en Tujetsch a Sogn Giachen hagi la lavina priu dus giuvens. Ei fuss d'augurar che quella nova seconfirmass buca."
Il Grischun Romontsch 1837, nr. 45, dils 3-1. Probabei ils sura dus. Lavina da Giuv.

1843
Ils 23 da matg ei Giusep Martin Peder da Rueras vegnius per la veta en in squatsch lavina en la Val Giuv sut il Draus cun far nitschuns. El veva 53 onns.

1850
Destrucziun d'ina casa a Selva entras ina lavina.

1853
Quei medem onn, ils 9 d’october, ei probabel era Balzer Antoni Curschellas da Surrein sedisgraziaus sper la punt da Cavorgia.

1853
Ils 30 da november ei Sep Antoni Giossi da Surrein sedisgraziaus dadens Nacla, selischnond dalla glatscha giu entochen en via encunter ina buora.

1854
Quei onn, ils 22 da zercladur, ei Tumaisch Giusep Schmed da Rueras, in buobet da siat onns, daus en in vadretg enasi la Vallatscha (Val Mila) per vigelgia sogn Gions, ed ei morts e tratgs ora dadens ils praus da Mila.

1859
Ils 6 da december ei Vigeli Venzin da Selva, returnond da Segnas, daus per tiara vi amiez il vitg da Sedrun ed en paucs muments staus morts.

1863
Val dil Plaun, ils 11 da schaner. Ina lavina destruescha dus clavaus a Selva.

1863
Ils 20 da zercladur ha il buobet da 9 onns, Caspar Muggli da Rueras, catschond duas vaccas sur la punt da Rueras vi, survegniu dad ina da quellas in stausch ch'el ei daus ell'aua. Pér sut Sedrun giu eis ei reussiu da trer igl affon miert ord il Rein.

1865
Ils 4 da fevrer ei il giuven Flurin Venzin da Selva vegnius ella lavina visavi Selva els Banaus, mond alla catscha sin cots selvadis.

1866
"La davosa fiera da Ligiaun ei ida buca mal, aschia era la fiera d'Altdorf dils 19 da november. In marcadont da Medel che ha frequentau quella, ha stuiu schar ventscher sill'Alpsu duas vaccas ella lavina, duas ha el pudiu liberar, mo stuiu schar ventscher ellas la notg sil cuolm. EI sez e siu cumpogn da viadi ein dalla lavina vegni fiers vi el lag, mo ein mitschai cun la tema e cun schar anavos ella neiv caput e capetsch."
Gasetta Romontscha, nr. 49, 5-12-1866

1868
Aua gronda. Donns da praus sut Rueras. Sbuaus a Sedrun. Donn da 8665. - frs. (1- 4 d'october)

1869
In paster da Tujetsch ha anflau sur il Lag da Tuma sper il Badus l'ossa d'in carstgaun, carteivel d'in mistergner che veva avon entgins onns falliu la via sur l'Alpsu.

1870
"Ella cufla dils davos dis d'october havess in Cavegn da Breil gleiti anflau la mort sill'Alpsu. Venderdis vargau ha el bandunau Ursera pér allas duas suentermiezdi. Vegnend sisum il lag, er'ei stgir ed el veseva buca pli ils parricars sco fastitgs dalla via. Per buca rescar dad ira surengiu ella stgiraglia, seresolva el da restar grad eri. EI batta in toc buna via e va cheu a spass en tutta aura dallas sis della sera entochen las sis della damaun. Lura anfla el il stradun e va in toc vinavon. Nunpudend rumper via po el susentar umens da Tschamut, che vegnevan encunter ad el. Ella Rheinquelle a Tschamut pren el sin sia aventura in bien solver e dorma lu 24 uras e sededesta viscals e da bunaveglia."
GR 1870, nr. 44

1871
"Dacuort vegnan dus Inglès giu dal Badus el Hotel Rheinquelle a Tschamut e spetgan leu sin lur tierz cumpogn, che fuva restaus empau anavos sul Lag da Tuma si. Ei vegn notg ed igl Inglès selai aunc buca ver. Ses camerats plein tema, ch'el hagi falliu la via, ni ch'ei seigi schabiau zatgei, tarmettan umens cun latiarnas e proviant sil Cuolm per encurir el. L'entira notg traverseschan quels plirs cuolms e Vals, greschan e schulan, mo anflan negin fastitg dil sepiars. Allas treis arrivan els anavos a Tschamut e declaran, che sch'el sesanfli aunc sil cuolm, seigi el buca pli en veta, tschelluisa havessien ei cun dar sinzur stuiu anfla el. En mesa desperaziun van allura ils dus Inglès culs dus umens sin nova tscherca, ferton ch'ei vegneva a Sedrun patertgau vid il cavar fossa per il disgraziau. La nova expediziun ei buca stada s'avanzada ton lunsch, ch'ella entaupa igl Inglès cartius morts. Quel di, ch'el vevi falliu la via e nunsavend nua semanar el stgir, seigi el sefiers sin ina meidia fein a pastg e durmiu stagn e bein tochen per la damaun vi. En triumf meinan ei el el hotel, nua ch'el ha dustau siu appetit inglès cun in brav solver "alla savetscha" e pagau generusamein ils umens, che vevan encuretg el. Ina tala aventura vala bia marenghins els egls d'in Inglès."

1872
Ils 12 da settember ei Giachen Fidel Maria Cavegn vegnius tuccaus d’ "in crap ruclont" en Val Giuv cun cavar cristallas e vegnius bess en ina fessa d'in glatscher, nua ch'ins ha anflau el schelaus e stagn morts.
Remarca: Giachen Fidel Maria Cavegn ha anflau igl onn 1868 en Val Giuv igl emprem Milarit insumma. Per schar intercurir e numnar il nievanflau mineral entras in institut a Berna, ha el fatg, carteivel sappientivamein, ina fallida indicaziun dil liug d'anflada e numnau quel en Val Mila. Aschia survegn il mineral il bi num Milarit.

1876
Ils 10 da schaner ein statalter Stiafen Schmed, in bab de nov affons, ed il giuven Gion Fidel Peder de 18 onns, omisdus da Tschamut, vegni ella lavina, fagend via ellas Vals (da Curnera) per vegnir ora cun fein a pastg. Dus auters giuvens, in da sedisch e l'auter da schotg, han ins aunc pudiu cavar ora vivs. GR 1876, nr. 2

1880
Entuorn ils 9 d'october ei Gion Antoni Deragisch da Sedrun morts o Bigliel da far si magliacs. En sia memoria pendeva ina crusch vid il clavau sper il stradun a Bigliel Sura.

1888
Ils 14 da fevrer, per mardis-tscheiver, ein ils dus giuvens frars, Barclamiu Peder e Vigeli Giusep da Selva, mond per ina vaulta draussa, vegni ella lavina gla beinmarvegl en Plaun Viradas, nua ch'els ein vegni bess sur in grep giu el Rein. Barclamiu veva 15 onns e siu frar Vigeli Giusep 17 onns. In han ins anflau pér la primavera en ina buola sut Selva. Els fuvan fegls da statalter Gion Antoni Peder da Selva.
(GR 1892)

1888
"Il cavrer Giachen Antoni Curschellas de Surrein, in giuven de circa 17 onns, ei sin ina plaunca semess giu per durmir, la capiala sut il tgau ed il fest enta maun, mo ei buca levaus si pli. Vegnend las cauras la sera persulas a casa, han ils vischins sminau ina sventira, ein spert i alla tscherca de lur cavrer, ed anflau quel morts ella posiziun descretta. Cumpatg ch'ei era vegniu giu in crap, che ha sturniu el." En sia memoria steva ina crusch vid il Sontget dils mats dil maun dadora.
GR 1888 nr. 25 (21-6).

1890
Gion Antoni Jacomet da Sedrun, in affon da dus onns, ei daus ell'aua sper il fallun da Salins e vegnius tratg ora morts.

1892
Ils 4 da fevrer ein ils dus giuvens frars Paul Giusep e Vigeli Giusep Valier da Camischolas, fegls da marcadont Battesta Valier, vegni ella lavina en las Ruinas da Pardatsch cun ir per lenna e restai morts. (GR 1892)

1892
Ils 7 da fevrer, gronda lavina a Caspausa - Milez - Rivas. Grond donn vid praus ed uaul.

1896
Il zercladur ei Gion Antoni Gieriet da Sedrun/Gonda, in buob da pressapauc 8 onns, daus en in vadretg sil Crest Liung en Val Mila. Ins ha anflau el l'auter di morts sur la Punt Miez.

1896
Il fenadur ei il cavrer Sep Martin Lutz da Soliva/Medel ruclaus ella Val Strem, el Pastuir digl Albin, encunter Cuolm da Vi e morts en paucs dis per consequenza dallas blessuras.

1896
Quei medem onn ei Margreta Monn da Rueras morta orasi Sur Giassa ina dumengia da stad, mond a Sedrun a messa. Ina crusch steva leu en memoria.

Tujetsch Ondadusa

Londadusa (Ondadusa), la val denter Uaul Flurin e dretg Uaul Camiscolas. Igl Uaul Flurin cun bravas largias.
Sut igl Uaul Flurin, encunter dretg, ei ina anteriura bova bein veseivla gest sur Flurin Sura. Ha quella bova a sias uras destruiu la caplutta da Flurin Sura che vegn menziunada el document da 1368? La disgrazia po esser schabegiada el decuors dil 15avel tschentaner.


 

 

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0341.jpg