Statuts dalla ludeivla vischnaunca Tujetsch concernent ina amegliuraziun dalla tratga da nuorsas ed il fatg contract cun Emanuel Deragisch dall’Alp Curnera

Sut datum dils 6 da december 1900 ei l’elegida cumissiun dalla ludeivla vischnaunca seradunada a Sedrun per prender entgins conclus co ins savessi ameglierar nossa tratga da nuorsas sco era co dar empau meglier uorden concernent la pasculaziun da quellas temps da stad ed atun e perquei intent tschentan si ils suandonts statuts ch’ein vegni mess avon alla ludeivla vischnaunca per approbaziun, il qual ei daventau ils 9 da december 1900.

1. Per arrivar tier in meglier raz ei stabiliu che la vischnaunca cumpri circa 30 anugls entirs, in tons valesans ed in tons ord il raz dils «Hoffs Val». Igl ei era fixau da cumprar pli u meins muts e ners sche pusseivel.
Las spesas da cumprar vegnan pagadas ord cassa da vischnaunca ed il prezi u valeta dils tiers duei tal e qual che surpren in tal anugl pagar.
Plinavon duei la vischnaunca procurar per nuorsas dil medem raz sin gaivisch da vischins da nossa vischnaunca denton tals amaturs dueien pagar era las spesas tier la valeta e s’annunziar tochen ils 18 da schaner 1901. Ils anugls dueien vegnir reparti sin ils vischinadis tenor diember da nuorsas pressapauc.

2. Plinavon duei per mintga vischinadi vegnir fixau 2 umens ils quals meinien controlla che tuts auters anugls, cun excepziun d’in u l’auter particulars bien e grond exemplar adattaus per bien raz, vegnien schubergiai avon miez mars, cass cuntrari han quels umens l’obligaziun sut peina da castitg da schubergiar tals anugls sin quen dil particular per la taxa da 50 raps per tier.

3. Ariguard la pasculaziun ei la cumissiun entrada en suandontas contractivas cun signur Emanuel Deragisch, resalvond l’approbaziun dalla vischnaunca sco ei daventau medemamein sut datum dils 9 da december 1900.
La vischnaunca da Tujetsch s’oblighescha da pagar a signur Emanuel Deragisch per l’Alp Curnera 950 frs. (novtschientschunconta) tscheins annualmein e quella cunvenziun vegn fatga per ils 3 onns proxims; aschia che l’Alp Curnera croda vi per diever quels onns alla vischnaunca e quella ei suverana da far diever dall’alp sco ei cunvegn e plai ad ella.
Emanuel Deragisch ha plinavon l’obligaziun da far megliurar la via denter Maighels e Curnera.

Ch’il sura seigi legiu avon ed approbau attesta
Vicepresident
Joh. Andreas Berther
Tavetsch


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0347.jpg