Normas tschentadas si dalla ludeivla vischnaunca da Tujetsch 1900, ils 3 da december

Havend la vischnaunca priu si l’Alp Curnera, sche ha la cumissiun stada eligida, anflau per bien da metter avon alla ludeivla vischnaunca las sequentas normas
I. co s’aranschar cun las nuorsas pil temps da stad e
II. co ins savessi aunc trer a nez la respectiva alp cun auters tiers.

I. Per quei fa la cumissiun la proposiziun che la vischnaunca duei fixar 2 cautegias da nuorsas che dueien haver quitau che las nuorsas vegnien pertgiradas cun tutta premura ed era mirar ch’ei vegni dau bien uorden pil cass da neivs.
Plinavon dueien quels umens haver la cumpetenza da cumandar al nurser cura ira cun las nuorsas d’in liug en l’auter sco cheu suonda pressapauc e quei era entras entelgientscha cun la suprastonza.
Ils 28 da zercladur dueien las nuorsas vegnir cargadas en Curnera e star leu tochen miez fenadur circa, respectiv entochen ch’igl ei sufficientamein maglia sin la Puzza e lu puspei suenter esser finiu la maglia sin la Puzza, also suenter 3 jamnas circa, turnar en Curnera.
En Curnera dueien las nuorsas pascular pli u meins la jarva si dad ault ord pastg da biestg, essend la jarva buna per nuorsas egl ault. Mo pil cass da basegns, essend ruh aura ni schiglioc scart da maglia, era magliar giu da bass, aschia che las nuorsas hagien sufficientamein maglia per tut temps a motiv che l’alp ei primarmein prida si per las nuorsas.
Essend ils stiarls naven da Maighels, sche dueien las nuorsas era magliar si Maighels, l’Alp Tschamut, Val Val e Val Giuv, aschia da temps a temps tenor ordinaziun dils cautegias.
Il nurser dueigi da tut temps pli u meins depender dils cautegias ed ira en liug a l’auter cun las nuorsas.

II. Per recavar ina resursa alla cassa da vischnaunca ha la cumissiun proponiu da prender si stiarls tochen sco la stagiada da Maighels porta e lura cun quels era far diever dall’Alp Curnera, senza pregiudezi dallas nuorsas.

III. Proposiziun fatga dalla cumissiun concernent il pladir il nurser. Per tal e qual che surpren da pertgirar las nuorsas temps da stad, tschenta la vischnaunca las suandontas obligaziuns.
Il nurser duei per aschiditg sco il survetsch cuoza star sulettamein vid siu uffeci da pastur e haver tut pusseivel quitau per pertgirar bein las nuorsas ed a motiv da quellas ordinaziuns resalva la vischnaunca il cumpetent dretg, da en tut cass da cuntents mussaments ch’il nurser hagi buca adempliu sias obligaziuns, seigi en in grau ni l’auter da strufegiar quel pil donn cun trer ad el giud la pagaglia 1 – 2 raps per nuorsa.
Plinavon ha il nurser l’obligaziun da far maner las nuorsas sin pastira da biestg tenor ordinaziun dils cautegias silmeins temps d’atun, la quala obligaziun ei medemamein suttamessa a castitg.

Ch’il sura seigi legiu avon alla ludeivla vischnaunca ed approbau sut il sura datum attesta
il vicepresident
Gion Andriu Berther

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img06.jpg