Uorden da lavurs cuminas per la ludeivla vischnaunca da Tujetsch - revediu 1897

1. Las lavurs cuminas da vischnaunca vegnan era dacheudenvi fatgas suenter las medemas normas sco tochen ussa.

2. Sur las lavurs cuminas vegn ei mintg’onn igl atun fatg quen ed ulivau. Tgi che ha dabien vegn pagaus ora cugl importo stipulaus per di ch’ei 2 frs.; tgi che ha da schliet duei stuer pagar quei medem importo per di. Per dus dis dabien ni dus dis schliet vegn ei buca fatg pagar ed era buca pagau.

3. In di lavur cumina ei quintaus naven dallas 8 tochen las 4, en quei ei in’ura ruaus da miezdi (il miezdi à 4 uras) e la ordinaria pagaglia ei 2 frs. per di.
Il survigilader ha aber il dretg da dar a fetg buns luvrers ni tier heftias e prigulusas lavurs tochen 2.50 frs. per di. El ha er la cumpetenza da dar a schliats e muncus luvrers 1.50 frs. per di e sut circumstanzias entras conclus dalla suprastonza aunc pli pauc.
Affons astg’ei vegnir priu negins tier las lavurs cuminas. In bov ha la medema pagaglia sco igl um, sa aber era sco igl um relativamein vegnir indemnisaus cun pli bia ni pli pauc.
Sch’enzatgi lavura in di pli che las uras legalas, sche vegn el indemnisaus tenor temps, lavura el pli pauc, sche vegn ei tratg giu tenor temps. Liungs viadis vegnan era risguardai enzatgei.

4. Certas lavurs pli grondas ha il survigilader il dretg da marcadar vi ad in ni a plirs tenor cunvegnientscha per in tons dis lavur cumina, bein aber sto quei adina vegnir fatg avon enconuschent sin vischnaunca.

5. En general ston quels vegnir visai, ils quals han da schliet. Vegnan quels buc, sche vegn ei visau auters. Sch’in ni l’auter vegn visaus e va buc, sche vegn ei quintau sco sch’el fuss staus, mo buca nudaus, vul dir, quei di croda da pagar. Lavurs provedidas ston vegnir visadas 24 uras avon (raschun per buca vegnir a lavur cumina).

6. La survigilonza dallas lavurs cuminas ei caussa dil tierz gerau en uffeci.
Denton duei en mintga vischinadi vegnir fixau in um, il qual survigilescha pli pintgas lavurs dil liug e dat part al tierz gerau.
La survigilonza dallas lavurs cuminas vid la via (priu ora trer chis) e vid plontaziun etc. san vegnir surdadas al bostger ed al vier.

7. Tuttas lavurs cuminas han dils organs numnai cheu sura da survigiladar.

8. Essend las lavurs cuminas per las lennas dils signurs spirituals e scolas vegnidas fetg grevas, sche vegn ei ordavon fatg dus dis lavur cumina per fiug.

9. Dispetas, che duessen levar si denter il survigilader dallas lavurs cuminas e singuls vischins, decidan igl emprem e scund gerau.

10. Tuttas lavurs cuminas extraordinarias ston vegnir approbadas dalla suprastonza e dalla vischnaunca sezza.

11. Il present uorden passa en vigur cun Daniev e l’emprema ulivaziun ei igl atun 1898.

Sut datum dils 7 da november 1897 ei il present uorden vegnius acceptaus unanimamein dalla ludeivla vischnaunca.

Attesta
Tujetsch, ils 7 da november 1897
Il president da vischnaunca Anselm Capeder

NB. Tras present uorden ein ils ulteriurs uordens da vischnaunca annulai.

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img01.jpg