Entelgientscha amicabla davart l’aua da Mila a Rueras1891 Aua Mila Rueras

Ils 30 da fenadur 1891 ein en preschientscha e sin mediaziun da president Joseph Condrau, ils coninteressai vid l’aua da Mila, sut Rueras, respectiv ils proprietaris dils clavaus da Mila ed ils proprietaris dils funs giu Mila, per evitar spesas processualas e per risguardar raschuneivlamein il vicendeivel basegns ed interess, secunvegni amicablamein sco suonda:

1. L’aua dils dutgs dil vitg dado e dadens che seuneschan ella gassa giu sur ils clavaus da Mila astga tenor cunsentiment dils proprietaris dils clavaus ira temps da stad, respectiv da calonda avrel naven entochen ch’il fretg da Mila ei prius si, dalla gassa denter ils clavaus giu, quei naturalmein ord risguard viers ils praus da Mila, che pitessen temps da fretg tras quell’aua, ferton che l’aua pregiudichescha buca ils baghetgs temps da stad.

2. Duess ei dar ina excepziunala malaura, cun tont’aua, che la sura numnada gassa denter ils clavaus pudess buca trer quella e donnegiass ils baghetgs, sche duei esser resalvau il dretg da better giu l’aua dil vitg dado direct dador il curtin dil fravi giu direct encunter Mila (enstagl sparter pér giu el cantun sur clavau) per sedivider en eventuals donns e cunzun schaniar il chischner d’Onna Maria Peder.

3. Giachen Antoni Wenzin s’oblighescha da vuler metter aunc en pulit stan uonn la gassa dils clavaus, sinaquei che quella tili l’aua, cunzun senza pregiudezi e donn dils baghetgs da maun seniester encunter ils quals l’aua penda.

4. Dil temps d’atun, cura ch’il fretg da Mila ei prius si entochen calonda avrel, pia duront gl’unviern, duei l’aua totala ir il vau encunter ils praus Mila, pia dil dutg ella cantunada dil curtin da fravi sur ils clavaus giu.

5. Scadin coninteressau vid venteala questiun ha il dretg sil fixau temps mintgamai dar la respectiva direcziun e viulta all’aua.

6. Concernent §4 ei aunc da renovar che l’aua dil vitg dado duei temps d’unveirn medemamein ira direct dado il curtin dil fravi giu encunter Mila, essend ch’ei emporta a quels nuot da tgei vart l’aua vegni, ferton ch’ei emporta als proprietaris dils clavaus ch’ei serimni buca memia bia silla plazza dil chischner e sbugli ton pli fetg.

7. Concernent §3 ei secunvegniu da per cass che la gassa denter ils clavaus duess inaga ni l’autra vegnir donnegaida, dueien schibein ils proprietaris dils praus, sco era quels dils clavaus da Mila communablamein puspei metter en uorden quella.
Quell’entelgientscha vegn scretta en treis formulars, in vegn surdaus agl archiv da vischnaunca, l’auter al Giachen Antoni Wenzin ed il tierz a Gion Antoni Beer da Rueras.

8. Dat ei dispetas davart l’interpretaziun dil verbal e cuntegn da quest’entelgientscha (p. en §2) sche vegn ei surschau la definitiva decisiun en caussa mintgamai agl actual president da vischnaunca da Tujetsch.

9. Tuts coninteressai e proprietaris dils praus Mila e dils baghetgs vegnan numnai da suttascriver quei act, lur register suonda.

Per corraboraziun dalla sura entelgientscha vegnan ils differents coninteressai cun num e schlatteina.

Rueras, ils 30 da fenadur 1891
Giachen Antoni Wenzin
Luis Caveng
Gion Fidel Berther
Gion Antoni Caveng
Sep Antoni Gieriet
Giachen Martin Peder
Duri Vigeli Schmidt
per Onna Maria Peder: Soliva Johann Anton
per Gion Antoni Beer: Giachen Fidel Caveng

1. Ils cumproprietaris vid ils baghetgs a Mila ein:
Onna Maria Peder
Gion Antoni Beer
2. Ils cumproprietaris vid ils funs a Mila ein:
Giachen Antoni Wenzin
Luis Caveng
Gion Fidel Berther
Duri Wigeli Schmidt
Giachen Antoni Schmet
Duri Battesta Muggli
Wigieli Deragisch
Frars Berther, Camischolas
Sigisbert Berther
Gion Antoni Caveng
Franz Joseph Loretz
Frars Riedi
Giachen Martin Peder
Sep Antoni Gieriet
Statalter Stoffel Riedi

Per conformitad attesta
Sedrun, ils 30 da fenadur 1891
Soliva Johann Anton, gerau

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img04.jpg