Regulativ sur dallas grevezias e gudida da tuts beins communals dalla ludeivla vischnaunca da Tujetsch, tschentaus si igl onn 1885 (PDF)

Sut datum dils 31 d’uost 1885 ei la dalla vischnaunca elegida cumissiun seradunada a Sedrun per tschentar si in niev regulativ, schibein sur dallas grevezias, sco era sur dalla gudida da tuts beins communals e formau sco cheu suonda.

A. Sur las lavurs cuminas
§1. Tuttas lavurs cuminas da vischnaunca, da scadina qualitad, dueien dacheunaven vegnir fatgas a norma da gudida da beins generals.

§2. Ei fatg ina excepziun cun il chis che la vischnaunca ei obligada da trer, quel duei vegnir marcadaus via da trer naven da Tschamut ensi tochen sin ils cunfins digl Uri e pagau ord cassa da vischnaunca.

§3. Scadina schurnada da lavur cumina ei fixada sigl avegnir sin otg uras da lavur, entschavend la damaun da mesa las otg entochen las dudisch, lura in’ura, quei ei tochen l’ina reprosit e cun quella ura puspei cuntinuar tochen mesa las tschun dalla sera (quei ei per il temps da stad), temps d’unviern aber entschavend cun il november entochen gl’emprem mars, vegn ei dau l’entschatta da mesa las nov dalla damaun entochen las treis dalla sera, laschond mo mes’ura reprosit e la schurnada vegn quintada per ¾ di.

§4. Scadin muncar dallas fixadas uras da lavur vegn reduciu a norma da temps.

§5. La norma da lavur cumina che mintga particular ha da purtar giu, vegn quintada ora sin sequenta moda:
Il diember total da dis lavur cuminas fatgas el decuors dad in onn vegn dividius el total import dalla gudida da beins communals en la quala classa crodan la lenna da fiug (sort) e la gudida da pastiras ed alps (tras tiers) aschia che ord il resultat da quei quen seresultescha ei il maximum ni il minimum dallas schurnadas, meglier detg, suenter quei import vegn quintau ora contas schurnadas mintgin ha da luvrar tenor sia gudida. Essend aber che in tal quen sa vegnir prezisaus per igl atun, sche sto mintgamai la gudida digl onn present vegnir luvrada giu igl onn futur.

§6. Sur dil resultat da nossas lavurs cuminas dapresent duei immediat vegnir serrau quen e schau luvrar suenter quels ch’ein anavos entochen Daniev ton sco pusseivel ei e zuar sut la presenta survigilonza e cuoz dil di.
Cun Daniev 1886 aber duei vegnir fatg e serrau giu in exact quen sur tuttas lavurs cuminas; quels che han lura da schliet dueien luvrar suenter e quels che han dabien dueien star eri entochen ch’ei ein ulivs.
A raschun aber ch’il present uorden duess passar en vigur per cun Daniev 1886, ed a raschun ch’il cuoz dil di lavur cumina el present niev uorden ei stabilius pli liungs, sche vegnan ils dis digl uorden veder, passond en vigur era egl uorden niev quintai, scadin ton ils dabien, sco ils da schliet, mintgin mo per ¾ di.

§7. Tgi che vegn avisaus tier lavur cumina e cumpara buca tier quella senza esser sufficientamein cun raschuns renconuschidas perstgisaus, ha el termin da 24 uras da pagar en cassa da vischnaunca la stipulada taxa e tier impurtontas lavurs duei mintgin che vegn avisaus, procurar per in sufficient luvrer, priu ora el cass da grevas malsognas.
Fuss in negligents tier impurtontas lavurs, sche duei tal stuer pagar la schurnada da 3.60 frs. La taxa per ils negligents che lavuran buca cura ch’ei vegnan visai ei stipulada da pagar al visader dalla lavur cumina frs. 2.40., il qual di vegn lura quintaus per luvraus.
Ils bos che vegnan duvrai tier lavurs cuminas vegnan reparti giu en duas classas, ils buns bos vegnan schazegiai 1 ½ di ed ils menders 1 di e la classificaziun ei surschada al survigilader e las uras da lavur per ils bos dueien cuzzar circa 6 uras ed igl um che va cul bov ha la schurnada sco in auter luvrer.

§8. Scadin luvrer silla lavur cumina ei obligaus da luvrar flissiamein suenter sias forzas; cass cuntrari vegn ad in tal reduciu la schurnada suenter merets.
Scadina famiglia che vegn clamada tier lavur cumina ei obligada da tarmetter sufficients luvrers tier la lavur cumina, sch’ei han tals en famiglia; cass cuntrari san quels vegnir enviai a casa ni reduciu la schurnada suenter merets.

§9. Ils luvrers sin lavurs generalas han da sesuttametter allas ordras e camonds dil survigilader da quellas. Ils dis da lavur cuminas dueien vegnir reparti sin las famiglias cun risguard dil diember da dis sil temps custeivel ni meins custeivel.

§10. La vischnaunca elegia annualmein ni per plirs onns in ni dus persunals che han da survigilar e direger tuttas lavurs cuminas, quellas controllar e taxar conform prestaziun dils luvrers. Per ils survigiladers dallas lavurs cuminas ei fixau ina schurnada da frs. 3 a di, ultra ston els aber menar tuttas gliestas e controllas e far tuttas lavurs internas gratis.
Mintgin che ha d’ira a lavur cumina duei silpli tard vegnir visaus la sera avon e (ed il cauvitg da) mintga vischinadi duei (avisar) haver in che avisa ils destinai tier la lavur cumina e tenor §7. aunc incassar ils 2.40 frs. dils negligents e quels lura surdar al survigilader.
Scadin cauvitg e cautegia duei purtar il quitau sch’igl ei necessari da remaduras sin siu toc intschess e lura repurtar al survigilader. Mintg’onn da Daniev duei vegnir serrau quen dallas lavurs cuminas, tunschess il stipulau quen buc, sche duei vegnir schau luvrar tenor bein manegiar sin igl onn futur, venzass ei aber aunc dis da lavur cumina, sche dueien quels vegnir schai luvrar giu igl emprem.
Tgi che mass a lavur cumina senza esser leutier visaus, survegn negina schurnada.

Taxas sin la gudida da pastiras ed alps cuminas
Per cuvierer las annualas expensas generalas vegn la gudida dils beins communals taxada sufficientamein per cuvierer igl annual communal deivet current. Duessen las expensas communalas nunprovidentamein in onn u l’auter crescher dil sura stipulau, sche vegn la vischnaunca era a tener sut quellas tras alzar las taxas mintgamai suenter ils basegns.

1. Pastiras communalas da segar
Tuttas pastiras da biestg e da cauras, priu ora quellas ch’ein concedidas als basignus, sco era ils Cuolms Aults vegnan sigl avegnir vendidas da segar (vul dir senza pregiudicar la necessaria jarva per la biestga) e quei tenor conclus dalla vischnaunca.

Scadin far nitschuns ei lubiu mo en greppa e buca sin sorts da paupers ni che vegnan vendidas ni en pastg da biestg e quei mo la primavera en in absolut cass da basegns cun allura aunc salidar la suprastonza.

2. Diever dils uauls
Tut far menedels, cuschas, draussas etc. etc. vegn schau tier sco tochen da cheu, ulteriuramein vegn observau igl uorden forestal communal.

Taxas dalla lenna en schetgas
a) lenna da fiug, sort entira      1.50 frs.
b) in lenn dad aissas      7 frs.
c) in quader      3.50 frs.
d) ina latta gronda      0.50 frs.
e) ina latta pintga      0.25 frs.

Taxa dalla lenna en uauls cumins
a) in lenn d’aissas per slondas      2 frs.
b) in quader      1.25 frs.
c) in lenn da clavau ni areisen     0.65 frs.
d) lenna da caltschina, il salmè     0.40 frs.
e) per bischels, il bratsch     0.05 frs.
f) per slusels, il pèr      0.20 frs.

Taxas sils s.v. tiers da vischnaunca che gaudan jarva
a) ina vacca      1.20 frs.
b) in stierl ni stiarla      0.60 frs.
c) in vadi      0.30 frs.
d) tiers manedels, il tgau      0.15 frs.
e) in s.v. cavagl      2.40 frs.
f) in pulein      0.60 frs.

Il fein jester paga da cheunaven 2.50 frs. la tschuncheisma.

Taxas sin dievers products per jasters
Jasters che vulan cavar ragischs da vinars sin nies intschess han da retrer dalla suprastonza ina patenta e pagar 10 frs. (diesch) en cassa da vischnaunca.
Mineralogs che fan diever da quei mistregn sin nies territori, han medemamein da retrer tier la suprastonza ina patenta e pagar quella en cassa da vischnaunca, 50 frs. (tschunconta).


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img05.jpg