J.M.J. (Jesus Maria Josef)

Titl. vischins

Havend la ludeivla vischnaunca da Tujetsch, ils 23 da quest, giu legiu ord lur miez ina cumissiun da commembers ord tuts vischinadis per schar luvrar ora in modus, co duvrar e guder las pastiras da casa, sch’ei quella cumissiun stada ensemen ils 29 da quest a Sedrun ed ha, suenter haver ponderau la questiunada caussa e suenter haver priu en egl il general beinstar dalla vischnaunca, unitamein priu il conclus d’admetter alla ludeivla vischnaunca per schar quella approbar ni disapprobar il sequent:

Las pastiras da casa ein communablas ed ord quella raschun ha scadin vischin da vischnaunca il dretg da guder ellas egalamein sco el vul.

Nuotatonmeins garegia la prudientscha che quellas pastiras vegnan gudidas cun in cert uorden.

1. La vischnaunca fixescha contas vaccas tener a casa.

2. Mintga vischin sto vischinar cun ses tiers da casa el liug, nua ch’el habitescha, in vischin jester sa vischinar en in auter vischinadi mo sch’ils vischins da quel ein cuntents.

3. Mintga sera ston las vaccas ni bos e stiarls da casa vegnir en igl agen vischinadi, ni silla pastira da quel sco fuva usitai entochen da cheu.

4. Cun ils pors e cauras stat mintga vischinadi sil territori vegl, quei vul dir sco igl ei stau usit entochen dacheu.

5. Ils vadials sa mintga vischinadi metter sillas pastiras da casa nua ch’el vul e quei sut pastur ni senza.

La cumissiun fa plinavon la proposiziun alla ludeivla vischnaunca da surschar il Pardatsch, ton da Vaccas sco da Stiarls en disposiziun dils vadials dall’entira vischnaunca e zuar san ins cheu metter sut pastur ni buc; appartenent ils cavals fa la cumissiun la proposiziun da prender si negins jasters ed ils cavals dalla vischnaunca schar star silla pastira da casa.

6. Essend uorden da vischnaunca da prender da part culs 24 da settember sche duei mintgin saver ira cun ses tiers nua ch’el ha ils baghetgs, ni nua ch’el vul, aber mo sillas pastiras da casa.

7. Igl uorden cheu allegau propona la cumissiun d’empruar silmeins 2 onns.

8. Tgi pagar las spesas ton da vischnaunca sco dil vischinadi da Sedrun pervia da quella fatschenta, quei vegn da far ora als signurs spirituals da vischnaunca.

Quels ein ils puncts, ils quals la cumissiun pren la libertad da metter avon ad ina ludeivla vischnaunca; il pareri ei buca sco biars desiderassen, aber da porscher in tal fuva la cumissiun buca el stan; ella ha encuretg da parter quei ch’era cheu sin ina moda e maniera che tut savess segidar; ord quella raschun fa ella la proposiziun alla vischnaunca d’acceptar el, cul giavisch ch’il vargau vegni emblidaus e che scadin vischin porschi il maun tier pasch, vivi e laschi viver e cheutras eviteschi novas dispetas, las qualas maglien ord nies cor la carezia proximala, ord nossa cassa ils daners.

Tujetsch, ils 30 da settember 1883
La cumissiun predeliberonta dallas pastiras da casa

 

Che il sura pareri seigi sut datum dils 30 da settember 1883 legius avon sco scret sin publica vischnaunca ed approbaus talis e qualis senza ni reservas ni cundiziuns sco quel plaida ton da part dalla vischnaunca da Tujetsch, sco era dil vischinadi da Sedrun, attesta

Soliva Johann Anton, president communal
Tujetsch, ils 2 d’october 1883

1883 Tujetsch Uorden da pastiras

Entir document en PDF cun smaccar sissu!

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0341.jpg