J. M. J. Jesus. Maria. Joseph.

Ils signurs spirituals alla ludeivla vischnaunca da Tujetsch  
(PDF dil document original)

In conclus dalla ludeivla vischnaunca fatgs ils 23 da settember 1883, ha incumbensau ils signurs spirituals da vischnaunca da decider: Tgi duei pagar las spesas fatgas si pervia dallas pastiras da casa?
La medema vischnaunca ha era concludiu, che tuts quens fatgs pervia da quellas varts, seigien entochen igl 1. da november vegni dai en als signurs spirituals, il qual ei era daventau e zuar ha il vischinadi da Sedrun mess avon ina spesa da 307.90 frs., la vischnaunca 350.80 frs., pia ensemen 658.70 frs.
Ils signurs spirituals dalla vischnaunca, stai ensemen ils 9 da november digl onn current en casa farria, han priu en egl ils quens ad els admess, han ponderau las raschuns pertgei quels seigien fatgs si, ed ha lura la maioritad da quels signurs, numnadamein 3, anflau per gest e dueivel, che la vischnaunca generala, quei ein tuts vischins da vischnaunca dueien pagar ils deivets fatgs si da quellas varts e zuar sefundescha quella decisiun sin suandonta raschun:

La dispeta ei versada vid ina caussa, la quala ei vegnida decidida per generala, da moda che negin ha dapli, negin da meins, tuts possedan tuttina;
sch’il vischinadi da Sedrun ei staus la part plongenta, sch’ei quel all’entschatta schon secartius da pretender per enzatgei, ch’el haveva il dretg;
il decuors dalla dispeta ha mussau si, che la part plongenta, ils vischins da Sedrun fuvan buca ord via, essend che la cumpetenta autoritad, il ludeivel Cussegl Pign ha decidiu: las pastiras ein communablas;
ina spesa aber la quala ei fatga si per ina caussa vid la quala tut ha part, duei era vegnir pagada da tuts, consequentamein ha la spesa da vegnir pagada ord cassa generala da vischnaunca.

Aschinavon sco buca tuts signurs spirituals ein stai dil medem meini, sche ha la vischnaunca da saver che la minoritad dalla cumissiun, representada entras igl aultreveriu signur beneficiat da Rueras, havess schau pagar las spesas giudizialas la vischnaunca, las autras mintga partida las sias.
La maioritad dalla cumissiun, ils 3 auters signurs spirituals, ein dil meini schon allegau, e la ludeivla vischnaunca ei aschia obligada da prender giu tuttas spesas ariguard quella fatschenta.

Aschia ei ei concludiu e stabiliu.

Tujetsch en casa farria, ils 9 da november 1883

Ils signurs spirituals da vischnaunca

1883 Tujetsch Pastira Sedrun Spirituals


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0341.jpg