Uorden co tener il s.v. taur da Camischolas

1877, ils 16 da december ein ils vischins stai avisai e seradunai tier il cauvitg ed han finalmein concludiu e vegni perina da far il sequent uorden pervia da tener il s.v. taur.

1. Ei vegniu concludiu da tener in taur da bien e clar peil ed era ualti bein qualificaus, il qual stoppi far la sequenta mesira. In stierl 6 ½ quartas, il mutg 7 quartas ed in bov 7 ½ quartas vedras. La numnada mesira deigi il tier esser da s. Bistgaun, quei ei ils 20 da schaner.
2. S’obligheschan ils vischins da pagar annualmein otg marenghins a quel che sto tener il taur. Ultra da quei sa il proprietari aunc schar menar tontas vaccas jastras sco el vul, bein aber sto el adina mirar ch’il taur fetschi igl uffeci per las vaccas dil vischinadi. Il pagament dallas jastras ei da quel che ha il taur.
3. Duei il taur sesanflar duront ils treis meins fevrer, mars ed avrel en in dils treis vitgs Camischolas, Zarcuns ni Camischolas Sura. Fatg in’excepziun cun Riedi Gion Fidel.
4. Ston tuttas vaccas, che vegnan menadas dil vischins avon s. Gions, pagar il taur, schegie ch’ellas vegnessen menadas tier in auter bov.
5. Sto il proprietari tener il taur entochen s. Gions, suenter sa el far cun il tier tgei ch’el vul e tuttas vaccas che vegnan menadas suenter quei temps, vegnan consideradas sco vaccas jastras, bein aber ha lura era mintgin il dretg da menar sias vaccas nua ch’ei plai.
6. Ha il proprietari dil taur il dretg da metter quel la stad sco taur da vischins cun sias vaccas, mo buca aber tener quel a casa.
7. Eis ei vegniu fatg giu rots e mess 20 vaccas per rot, tratg la sort ed igl emprem onn ei tuccau a statalter Lorens Jacomet d’entscheiver e degi ira anavon sco la roda dil cavrer. Vegn ei buca uliv il rot, sche deigien las vaccas d’in pur buca vegnir spartidas sche pusseivel ei, sonder iu vinavon entochen ch’ei vegn in pur ch’ins sa ulivar il rot, nua ch’ei vegn aber per ina ni duas vaccas dapli ni meins era approbau. Stuess ei vegnir spartiu las vaccas d’in pur, sche degi quel stuer ughegiar la sort mo in onn e zuar igl onn ch’el sto neu cun las biaras vaccas.
8. In pur che ha mo ina ni duas vaccas ei buca obligaus da tener il bov, mobein sto el ulivar il rot cun ils auters e per buca stuer ughegiar la sort cun ils vischins da siu rot, sto tal pagar quei onn 2 frs. per vacca a quel che sto tener il taur.

Per confirmaziun suttascriva il cauvitg
Wigieli Berther
NB. Sco visitaders ein dessignai:
Lorens Giacumet
Duri Deflorin e
Giachen Antoni Schmed

1880, ils 25 d’avrel, han ils radunai vischins, concludiu: che mo pors che van en pastira stoppien en sort da far roda, ni stuessen pagar sch’ei fuss pastur.
per conform, il cauvitg
Martin Berther

1903, ils 17 da matg, ei il vegl uorden da pertgirar pors vegnius ruts, ed han ils radunai vischins concludiu che tuts pors e purschals ch’ein stai ord nuegl, stoppien en sort da far roda da pertgirar pors.
per conform, il cauvitg
Hans Giachen Berther

Camischolas 1877 pag 1Camischolas 1877 pag 2
Camischolas 1877 pag 3Camischolas 1877 pag 4


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0302.jpg