La vischnaunca da Tujetsch cun ils possessurs dalla gassa ida en da Cavorgia Sura

Sin repetida damonda dils vischins da Cavorgia e possessurs dils praus e baghetgs da Cavorgia Sura han instanziau tier la ludeivla vischnaunca che quella vegni a concluder d’inagada per adina da schar ira sut la gassa e classena da quei toc territori, essend ch’els seigien cuntents da cheu anavon mo cun dar cheu in viadi a pei per il temps da fretg per luvrar ses funs e guvernar ses baghetgs sil territori da Cavorgia Sura.
1876 Gassa Cavorgia Sura
Sche sut il datum da 1875, ils 13 da zercladur, ha la ludeivla vischnaunca da Tujetsch teniu vischnaunca el solit liug ed unitamein decretau da schar ira en quella gassa, la quala ha ils cheu suandonts cunfins:
Giudem sur la punt, sco il péz dil prau taglia ora encunter la seiv da de „ferster“ Maissen da Mustér.
Dadora ils suloms dallas casas tochen otier ils cunfins.
Dadens il begl anen sco la seiv sisura dalla gassa taglia giu encunter la seiv giusut, nua che en quels treis loghens dueigi vegnir schau en scadin liug ina purteglia.

Milsanavon ha la vischnaunca dau la autoritad da vender quella gassa e seregular cun ils vischins da Cavorgia sco el anfli per il meglier e tener sin beinmanegiar e quei a gerau Schmetd.
Sche suenter ver priu en tuttas mesiras per la gassa e classena e staus pliras gadas en contractivas da vender als confinans vischins dil prau da Cavorgia Sura, ei oz ils 13 da zercladur 1875, vegniu serrau suandont contract da cumpra e vendita.

Gerau Giachen Antoni Schmetd ensemblamein cun gerau statalter Lurenz Giacomet dattan e vendan la cheu sura terminada gassa da Cavorgia Sura als cheu suandonts cumpraders, Giachen Antoni Schmetd, Lezi Balzart, Luis Hendri, Vigelli Hendri, Gion Antoni Schmetd, Thomas Schmetd, Giachen Martin Curselas e Gion Antoni Giacomet, tuts da Cavorgia, priu ora in da Surrein, sut las cheu suandontas cundiziuns sco suonda:

A. Per igl emprem ston ils cumpraders schar e far e mantener treis purteglias sin ils treis indicai cunfins, sco era clauder odem encunter ils cunfins da Mustér la spunda d’in prau tochen l’auter en grada lingia e mantener a quen siu, cun la remarca che sisura en entochen sitier il grep dueigi Rest Gioseph Giacomet clauder enstagl ira cun la lingia enterviers viagiu ed ei schau ad el tragiu classena che va en; ultra da quei dueigi il sura bonificar alla vischnaunca per classena ida en 19 frs., ditgel francs scheniv.

B. Plinavon sedeclaran e s’obligheschan da en quels treis loghens schar in repass d’ira la glieud il temps da fretg, seigi lura per luvrar e cultivar ils funs ni baghetgs che sesanflan sin il territori da Cavorgia Sura, sco era repass tier autras lavurs per quellas sendas, ils auters temps duei scadin ver liber transit tenor usit da nossa vischnunaca d’ira vidaneu cun tiers e menadiras.

C. Ils baghetgs cunfinonts cun quella gassa vegn ei da vart dalla vischnaunca resalvau ses lidimes per metter la grascha da tut temps, sco mera da ver en tiers en quels baghetgs e buentar ni schar ira ora a pascular temps da fretg per entochen ch’ei vegn fatg en general mundi ed igl atun aschigleiti sco igl ei dau lartg.

D. Finalmein han ils avon cumpraders aunc empermess da pagar 250 frs., ditgel farncs duatschien tschunconta sin d’atun e zuar en moda sco suonda:
1mo. Dueigi vegnir pagau en massa sin tut ils cumpraders 220 frs.
2do. Duei Gion Antoni Giacomet pagar ultra dalla massa 11 frs.
3tio. Duei Rest Gioseph Giacomet pagar per seiv ida en 19 frs.

Aschia cheu igl avon tut ei la vischnaunca pagada ton per il terren dalla gassa, sco per schar ira en mirs e classenas ed ils cumpraders han nuot pli lunsch da rispunder da quellas varts e vegn lura serrau igl avon accord ed attestan
dallas parts sezzas

Cumpraders:
Lezi Balzart 
Gion Antoni Schmetd 
Luis Hendri 
Jakob Schmedt
Tomas Schmet
En num dalla vischnaunca:
per quella
Giachen Antoni Schmetd, vendider
Lorenz Jacomet, president communal

Registrau el secund cudisch, pagina 30, nr. 60, attesta

Tujetsch, ils 25 da november 1876
Jacob Schmetd, registratur

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0254.jpg