Cunfins, dretgs e grevezias dall’Alp Tschamut, che vegn messa sin ils 15 da mars en public ingant d’alpegiaziun per ils sequents tschun onns, 1866, 1867, 1868, 1869 e 1870.

La vischnaunca da Tujetsch, sco possessura dalla sura alp, ha suenter haver concludiu da schar via da paschentar l’alp, era el medem temps concludiu da buca schar via la sura alp per meins che per tschun onns, sco era buca per in pli bass tscheins che quei che l’entira alp stat alla vischnaunca, ch’ei 640 frs. annual.

1. Ils cunfins dalla sura numnada alp ein sco suonda: oragiusut la pastira da casa da Tschamut, da l’autra vart l’Alp Cavradi e l’Alp Maighels e la Tuma encunter Uri, da l’autra vart l’Aua u Alp Surpalits era enasi encunter il Crest da Muschaneras, quei ei bein d’entelgir, dil maun da Cuflegl, e sco quel va si encunter la greppa, si las Puozas ei tut dalla vischnaunca, quei che penda encunter il lag da Uri.

2. Resalva la vischnaunca per sesezza, sco ils vargai onns l’usitada Tgauma enasi encunter il Crest Cuflegl, sco era il Cuolm Ault da segar,1866 Cunfins Alp Tschamut ch’ei nominativamein ils sequents loghens: Il Denterdutgs, las Plauncas Nurschallas ed ils Bauns Tuma davontier, sco era il transit per ir enta Maighels ed ora cun ils stiarls ni auters tiers, aber adina cun stuer ira vinavon senza paschentar.
Era resalva la vischnaunca ils vegls dretgs dil vischinadi da Tschamut che sias cauras possien da tut temps I: resalvond la notg :I star en l’alp, sco era las nuorsas dil detg vischinadi han ils dretgs en l’alp tochen che la vischnaunca carga ad alp. Quellas nuorsas aber pon ils paltaturs, sch’ei plai enviar ord pastg da vaccas si viers encunter pastg da cauras, aber adina sin ina dueivla moda e buca cun tgauns.

3. Dat la vischnaunca per l’alp in’untgida, po vegnir gudida cura l’alp ei cuvretga cun neiv - e quella bandunar aschigleiti sco l’alp ei terreina, ton che sa vegnir pischentau. L’untgida ei sco suonda, sur Selva e stradun, il Pastg, tochen ora Carmihut e la Foppa Tschuppina sut via.

4. Vegn dau ils dretgs als paltaturs dall’Alp Tschamut da quella puder paschentar cun da tgei qualitads da tiers che ad els cunvegn. Era pon ei, sch’ei plai, segar ils suandonts loghens I: aber buca dapli :I
1. Tut il Cuflegl dadens e dadora entochen giu tier il pastg da vaccas e si sper Cuflegl entochen tier il pastg da vaccas.
2. Tut las Surplattas tras vidaneu quei che penda encunter ils Cuflegls.
3. Tut las Nurschallas Pintgas, quei tut sco tochen da cheu ei vegniu segau.
Dil rest, resalvond ils loghens en questa numnai, duei, ni dils paltaturs, ni dils vischins da vischnaunca vegnir segau, ni pauc ni bia, sut peina da castitg.

5. Dueien aschibein ils paltaturs dall’Alp Tschamut, sco era il vischinadi da Tschamut sin lur pastira da casa, sco era l’Alp Surpalits e Maighels, adina haver buns e sufficients pasturs, ils quals seigien el cass da tener da tuttas uras ils s.v. tiers mintgin sil siu.
Duess ei aber cun tut quei schabegiar enqual mitschada, sche ha scadin il dretg da turnar a volver ils tiers anavos giud il siu sin ina dueivla moda e senza puder pretender pindrada.
Duess ei aber encunter tutta speronza esser d’ina u l’autra vart, memia gronda negligientscha cun schar ira orsura ses tiers, seigi da di ni notg, ni era aunc vegnir catschau e paschentau ordsura voluntariamein, sch’ein tals e quals, suenter esser stai admoni, da vegnir tratgs en censura dalla suprastonza da vischnaunca.

6. Ein ils surprendiders dall’Alp Tschamut obligai da pagar igl annual empermess tscheins, avon che bandunar quella cun lur s.v. tiers.
Sco era sch’ei vegn garegiau dils surprendiders dalla vischnaunca I: dar schon immediat suenter esser serrau giu la cunvenziun :I dils surprendiders ina sufficienta garanzia pigl annual tscheins e quei ordavon per tuts tschun onns.

La suprastonza
per quella
Lucas Cavegn

 

1866, mars ils 15, ei l’Alp Tschamut, en public ingant, vegnida per quels tschun onns avon menziunai, surdada als suttascrets per igl annual tscheins da francs sistschien e siatonta, cun cefras 670 frs.
Dil rest eis ei dau e surdau cun ils cunfins, dretgs e grevezias, talis e qualis, sco la presenta scartira plaida, ni dapli ni da meins.
Per confirmar il sura suttascrivan ils surprendiders cun agen maun.

J. Anton Muggli
Paul Schmed per Vigeli Giacomet

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0254.jpg