1866 Cunvenziun Vischnaunca TschamutBrev da cunvenziun denter la ludeivla vischnaunca da Tujetsch ed il ludeivel vischinadi da Tschamut – 1866

Cunquei ch'il vischinadi da Tschamut veva in’atgna alp ed era pastira da casa exceptuai dalla vischnaunca e quella veva da l'autra vart sias alps e pastiras per ella, ha quei da temps en temps dau caschun tier questiuns, dispetas e custeivels process e quei nominativamein el novissim temps, sch'ein omisduas parts vegnidas tier il patertgament d'entrar en ina amicabla cunvenziun e far fin a tuttas dispetas e questiuns ch'ein ussa avon maun, sco era da prevegnir ad ulteriuras questiuns da quellas varts. Per vegnir tier quest, d’omisduas varts convenabel e desiderau intent, eis ei denter la ludeivla vischnaunca ed il vischinadi da Tschamut vegniu serrau giu la sequenta cunvenziun, la quala hagi da valer e cuzzar per adina e per tut temps.

Las stipulaziuns da questa cunvenziun ein las sequentas:

1. Surdat il vischinadi da Tschamut tras la presenta per ils presents vischins sco lur vegnentsuenter tut quei ch'il vischinadi sco tal posseda per el; seigi alp ni pastira, alla ludeivla vischnaunca ussa e per adina, aschia ch'els san da quei far negina pretensiun pli, ni per bia ni per pauc auter che sco vischin da vischnaunca, essend che quei tut duei esser proprietad da vischnaunca sco auters beins communals.

2. Leu encunter han ils vischins da Tschamut art e part da tuts beins communals dalla vischnaunca, seigi da tgei natira che quels ein, han aschia il dretg da guder quel, adual auters vischins suenter uorden che la vischnaunca ha, ni stabilescha enzacuras. Medemamein ei il vischinadi da Tschamut obligaus da prender part da tuts deivets da vischnaunca derivien da questa cunvenziun ni ord autras raschuns, quei ei sco els han art e part da tuts emoluments activs, ston els era prender part da tut passiv da vischnaunca, aschia ch'els en tut ein aduals als auters vischins da vischnaunca.

3. Al vischinadi da Tschamut sco tal vegn ei dau ils dretgs da catschar lur s. v. cauras sco tochen da cheu, seigi sin alp stada da Tschamut, ni en auters loghens, las nuorsas han il medem dretg tochen che la vischnaunca carga quellas, lu ston ellas vegnir messas cun quellas dalla vischnaunca. Ariquard auters s.v. tiers, han els da star vid igl uorden da vischnaunca ed han ils medems dretgs sco auters vischins. Ariguard la pastira da casa vegnan els en tuts risguards teni ni meglier ni mender ch’auters vischinadis.

4. Per ina recumpensa ch’il vischinadi da Tschamut ha mess en massa ses emoluments, surpren la vischnaunca ils sequents deivets dil vischinadi:

Tumaisch Berther 500.00
assistent Tumaisch Schmit 400.00
statalter Gion Paul Riedi  547.28
fargliuns Helenas 400.00
Gion Giusep Riedi 600.00
assistent Giachen Antoni Schmit 2608.50
pervenda da Selva 300.00
alla Caplutta da s. Nicolaus, annual 1.36  27.20
per benedir l'alp, capital 81.60
la „Sparcassa“ cantunala 1912.44
total  7379.02

Finalmein bonifichescha la vischnaunca aunc als vischins da Tschamut per 12 ½ fiugs per ina recumpensa ch'ils actuals vischins ston gidar a purtar il deivet total da vischnaunca sco auters vischins, la summa da 400 frs. ditgel francs quater tschien per fiug, ils quals ein atgna proprietad particulara.

Cun quei dueien tuttas questiuns denter las numnadas parts esser e restar finidas, e negina part ha da far reclamaziuns ulteriuras buca pli stipuladas en questa cunvenziun.

Aschia daventau a Tujetsch, per cunfirmaziun suttascrivan ils 4 da mars 1866

Per la vischnaunca  Per il vischinadi da Tschamut
Lucas Caveng
Giachen Antoni Schmit

Vieua Lisabeth Loretz, cun sia noda casa F
Gion Paul Peder
Stiafen Schmit
Martin Riedi
Rosa Riedi fa sia noda casa
Barclamiu Berther, fa sia noda casa
Per statalter Gion Clau Sievi, fa sia feglia Maria Catrina sia noda casa
Giachen Antoni Deflorin
Carsenzia Vertg, fa sia noda casa
Sep Antoni Schnoz
Gion Giaseph Riedi
Augusta Riedi
Gion Paul Riedi 


Che la presenta cunvenziun seigi registrada el cudisch dils marcaus e brats sut paina 370, nr. 1, da Tujetsch attesta 

Giachen Antoni Schmetd, registratur
Tujetsch, ils 2 da fenadur 1866


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0341.jpg