Radunonza da vischnaunca dils 26 d’october 1862

Concernent co entscheiver a pagar ils deivets ch’il stradun ha caschunau, eis ei d’ina cumissiun vegniu tschentau si in pareri e la vischnaunca ha acceptau quel talis e qualis sco el ei da quella vegnius tschentaus si.
Tuts burgheis da vischnaunca pagan, seigien presents ni absents, tenor lur facultad netta sco il cadaster muoss’ora 70 raps per 1000 frs., medemamein paga mintga fiug 50 raps.
Dapli paga mintg’olma 20 raps l’ina, tuts burgheis da vischnaunca seigien presents ni absents.
Per pagar igl arvè dalla claustra ed auters deivets da quella, che appartegnan lura tier als da Tschamut, eis ei mess si ch’ei vegni pagau per cavagl 40 raps, vacca 20 raps, per in stierl, stiarla e pulein 13 raps, vadi 6 raps, cauras e nuorsas 2 raps, tiers casa 4 raps ed ansiel 1 rap.

Sut il sura datum ei vegniu radunau ina cumissiun predeliberonta per seconsultar sin tgei pei prender per pagar giu igl arvè dalla venerabla claustra da Mustér, sco era co pagar il deivet dall’expropriaziun dalla via nova, classenas suenter quella, sco era da concluder sin tgei moda e maniera ins vegli augmentar las pervendas dallas caplanias da Sedrun e Rueras.

1. Ei vegniu tschentau la damonda, schebein ins vegli projectar da prender per pagar quei deivet tut ord ils beins communals, seigi quei ord uauls, pastiras ni alps, per buca schar leu a dies alla vischnaunca in aschi enorm deivet, ni sche ins vegli far taglias sin rauba, fiugs, olmas e tiers.

2. Ei suenter ina liunga e viva discussiun vegniu tschentau si il suandont project e quel purtar avon alla vischnaunca per la approbaziun ni disapprobaziun.

A. Deigi vegnir fatg ina taglia generala sin fiugs, olmas, rauba e tiers e zuar senza attaccar ils beins communals. Quella taglia deigi vegnir fatga 4 onns, numnadamein entscheiver 1862 tochen 1865 inclusiv la taxaziun da quella taglia deigi sin mintga specia, vegnir fatga mintg’onn tenor sco la vischnaunca anfla per bien e sco ils basegns damondan. Ariguard la taglia sin rauba, deigi vegnir priu la rauba che exista el register da taglia dils onns sco sura numnau. Era quels che cumparan buca cun rauba el register da taglia, deigien pagar suenter la rauba netto ch’els possedan.

B. La taglia che vegn fatga deigi mintg’onn vegnir teniu quen e protocollau, tgei e con ei vegn pagau en ed alla fin dils 4 onns vegnir summau ensemen igl entir capital che vegn pagaus en.

C. Concernent l’augmentaziun dallas caplanias u farria deigi era vegnir teniu quen e protocollau tut quei che flessegia ord cassa da particulars, da maniera che, sch’ei dess pli tard viultas sur ils beins generals entras las autoritads superiuras ord vischnaunca sur il gudiment dallas alps, pastiras ed uauls da nossa vischnaunca ch’ils descendents vischins che existan da talas uras, hagien il dretg da far diever dils beins generals, per quels dus capitals sco vegn a mussar la serrada dils quens che vegnan cheu sunenter mess per scret specificamein.

D. Duess ei pli tard secolocar en nossa vischnaunca vischins jasters en qualitad da assesents (: beises :) seigien quels da nies cumin ni era pli allontanai, sche deigi la vischnaunca tractar quels tenor dretg e leschas dallas autoritads superiuras, aschilunsch sco siu dretg sextenda, bein aber deigien quels aschigleiti ch’els han priu siu domicil en nossa vischnaunca, pagar alla cassa da vischnaunca a norma sco ei po tuccar per fiug, dils dus sura numnai capitals che duei vegnir repartius suenter ils 190 fiugs che existan en nossa vischnaunca.

C. Sut ils 26 d’october ei il sura pareri vegnius purtaus avon alla vischnaunca e da quella approbaus tal e qual sco el ei screts, cun la clara cundiziun che scadin vischin sappi guder cun ses tiers alps e pastiras, sco era ils uauls sco tochen da cheu, oz e per adina.

Las notizias dalla cumissiun

Taglia 1862

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0326.jpg