Entelgientscha co guder las alps e pastiras

Sedrun, 1861, ils 16 da mars, ei seradunau ina cumissiun per sedeliberar co guder il dallas alps e pastiras.

1. Enten Maighels ei destinau da cargar stiarls e vadials e zuar il quantum stagiau da 210 tgaus. Schabegia ei onns che la vischnaunca ha paucs stiarls, sche duei ei vegnir cargau mo 200. Quels gaudan l’entira alp da Maighels, tut il Surpalits entochen enasil lag e gaudan encunter Tiarms: naven dil tierm dalla crusch e sco quel fila si encunter la Gonda dallas Pegnas e zuar giudem quella; han untgida da neivs oragiu denter l’aua Nual e Val Vadretg.

2. Sil Tgom ei stagiau stiarls ni vadials 90 tgaus, gaudan igl entir Tgom; encunter Pardatsch entochen enagiu Palits. Il Palits vegn gudiu cun ils cavals ed ensemen; encunter Stavelsecs sco il trutg che va en la Val dil Run e zuar sco quel che va grad sulla Fontauna en; encunter Nual sco l’entira Val dalla Puzza, sco il crest u fil oradem il Mun da Femnas fila giu encunter ina gondetta e tochen giu tier il trutg, aber buca sut quel. Untgida da neivs enagiu Pardatsch.
NB 1. Duess ei crescher stiarls en quellas duas alps dil sura stagiau, sche vegn ei augmentau en mintga alp a proporziun dil stagiau. Duess ei calar dil sura stagiau, sche vegn ei cargau enta Maighels mo 190 tgaus e sil Tgom stat alla ludeivla vischnaunca da metter si auters tiers da quella, ni era prender si tiers jasters e metter sin quella, sco ella anfla per bien.
Quellas duas alps ein unidas q. e. quels ch’ein en in’alp e ston ora in onn cun la sort, sche ston quels buc ora pli tochen che tuts ein buca stai ord quella, era sch’ei stuess vegnir separau ils tiers d’in pursanavel. Era eis ei s’entelgiu che mintgin po metter vadials cun ses stiarls, sch’ei plai, seigi en in’alp ni en l’autra.
NB 2. Mintga particular ha il dretg da prender per ses stiarls alp nua ch’el vul q. e. cun stiarls e vadials e quei mintg’onn.

3. Strem, Val Mila e Caschlè ei stagiau 160 stiarlas ni genetschas, Strem 85 e Mila 75. En quellas duas alps po ei vegnir e duei vegnir observau igl uorden dils stiarls ariguard igl ulivar, duess ei crescher en vischnaunca stiarlas dil sura stagiau, sche dueien las stiarlas tonaton mo vegnir en quellas duas alps. Ils da Strem han untgida da neiv oragiu la Gonda Dadens. Ils da Mila ora Mila e Uaul Flurin, cura ch’ein si Caschlè giu gl’Uaul Flurin. Schabegiond gronda neiv, da maniera ch’ei san buca grad turnar si Caschlè ni ch’ei massen schiglioc buca si pli, sche dueien quels ch’audan en Mila ira dalla Val Mila en, ils da Strem ira tras la pastira da casa da Camischolas tochen en la Gonda Dadens e schigleiti sco igl ei terrein en Strem ira cun las stiarlas ell’alp.
Appartenent tier las genetschas ha la vischnaunca resalvau ch’en cass ch’ei duessi calar enzatgei da num dil sura quantum dallas stiarlas, sche vegn ei mess en quellas duas vals intontas genetschas e prender quellas ulivamein ord las alps dallas vaccas a proporziun. Quellas gaudan sco igl ei stau ils onns vargai; enten Mila tochen o tiels Druns. Enten Strem gaudan dil maun da Valtgeva tochen o la Gonda da Plaunca Gion Giachen; dil maun da Camischolas tochen ora tier las Plauncas Verdas.
Schabegiond il cass ch’ils da Strem ston star sill’untgida plirs dis, sche dueien ei paschentar in di dil maun da Valtgeva ed in di dil maun da Camischolas; aber adina paschentar anen encunter l’alp e buca anora.

4. Val Val cun Tiarms e Cuolm da Vi vegn cargau vaccas ed ei stagiau 240 tgaus; gaudan encunter ils stiarls a Surpalits duront ch’els ein leu tochen enagiu il tierm dalla crusch e sco quel fila ora si encunter la Gonda dallas Pegnas. Suenter ch’ils stiarls van naven da Surpalits, sche pon ei guder tochen oragiudem il Stavel da Muschaneras e sco leu fila orasi encunter la sura numnada Gonda dallas Pegnas. Encunter Val Giuv gaudan quels tochen ora giu Milez Sut nomenativamein tochen il Crap Gries e sco quel fila vi encunter ils trutgs encunter Crest da Tiarms e da leu naven sco quel fila viasi encunter Stavel dil Bostg e dil fil dallas Bostgas enasi. Sper Stavel dil Bostg duei ei vegnir mess en in tierm da dus pursanavels, numnadamein in da Val Giuv ed in da Val Val e quei tierm duei vegnir mess sin il Crest sut la canal, quei tierm duei filar encunter ils fils sco sura stat.
Duront ch’ils da Val han ora sil Cuolm la caschada, pon ei era guder vi las Bostgas, aber buca d’auter temps. Temps da neiv han quellas alps a Scharinas e Milez en nuegl. Duront ch’ein si Cuolm da Vi han ei untgida giu las Foppas.

5. Val Giuv, Culmatsch, Nual e Mut vegn cargau vaccas ed ei stagiau 215 tgaus; gaudan encunter ils da Val Val sco ils cunfins dils da Val ein determinai; l’entira alp da Val Giuv, tut il Liez, il Culmatsch, l’entira Plaunca Biala tochen enasi il trutg che va a Puzza Pintga, pon era vegnir cun las vaccas dil trutg en e da sum las Bostgas giu cun las caschadas; aber pon vegnir da cheu giu pér suenter quei ch’ils da Val ein stai otg dis permanentamein sil Cuolm, suenter quei ch’ein vegni giu dils Cuolms Aults. Gaudan era tut l’alp da Nual e Mut ed encunter ils dil Tgom sco ils cunfins dil Tgom ein determinai. Han untgida giu ils Plauns Selva e gaudan encunter la pastira da casa dils da Selva sco la partiziun dallas alps dils stai vargai onns.

6. Cuolm Cavorgia e Stavelsecs vegn cargau vaccas ed ei stagiau 55; gaudan igl entir Cuolm e Stavelsecs, ein ils cunfins encunter ils dil Tgom sco igl ei determinau ils cunfins dils dil Tgom. Untgida enagiu ils Plauns Pardatsch, pon era clauder enagiu dil Cuolm ils cavals cun far ina seiv cun lattas derschidas.

7. Appartenent igl ulivar las alps, dueien quels che ston ora culla sort ord in’alp l’emprema ulivada, ston per quella partiziun star en quella nua ch’ei tuccan, la secunda ulivada turnar nua ch’ei eran stai, sco igl ei stau usitau quels onns vargai.

8. Enten ils Pardatschs vegnan cargai tut ils cavals e gaudan tuts ils Pardatsch, sco ils onns vargai. Tgi che tegn buca vacca a casa ed ha basegns d’in cavagl per trer fretg, sche dueien ei puder tener diesch dis igl emprem per far fein grass e sis dis per trer graun e truffels, aber la notg adina metter en nuegl. Tgi che drova cavals per menar rauba mercantila e sto perquei ira ord vischnaunca, sche pon ei vegnir ord l’alp il di avon, ed il di ch’ei tuornan pon era star quei sez di sin la pastira da casa, aber la notg adina en nuegl. Tgi che cunterfa cun ils cavals el sura appartenent la notg, sche dueien ei stuer pagar als vischins nua ch’ei sattan 50 rps. per notg e sut castitg digl obercheit.

9. Ils vadials po mintgin metter nua ch’el vul e rugalar suenter plascher, aber adina haver exactamein ord praus e buca far pastur sin pastira da casa d’auters vischins, nua ch’el ei buca vischin.

10. Appartenent il caschar en las alps la primavera, dueien star sco ils 14 onns vargai. En quellas ch’ei lura stau lubiu, duei era ussa esser lubiu, aschia ch’otg dis avon cargar, po ei buca vegnir mulschiu e caschau en las alps ch’era avon buca lubiu. Caschar pon ei la primavera a Surpalits, Tgom, Stavelsecs e Strem.

11. Las nuorsas dueien vegnir cargadas quater dis avon auters tiers.

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img04.jpg