Clom d’agid entras igl Uffeci da cumin

Alla ludeivla suprastonza dalla vischnaunca …….

Sut ils 18 dil present (fevrer 1850) fa il „Vorstand“ da Tujetsch da saver, che sut ils 27 da schaner, seigi cun caschun ch’ils vischins da Selva ein fugi ord lur vitg muort tema dalla lavina, barschau giu dadanes Selva ina casetta e clavau al Martin Peder, il qual ha tier quest barschament piars 16 armauls e 5 – 6 tschuncheismas fein, aschi ch’il donn total s’augmentescha tenor schazegiada daventada tras ordinaziun dil suttascret sut ils 25 da fevrer sin la summa da 1010 frs.

Martin Peder ei in um vegl inhabels tier la lavur, ha siat affons, dils quals dus ein da negin agid, quels vivevan cun prender si praus per tscheins, semudergiavan cun il lur e cun far fein a pastg; lur facultad ei enviers il donn pitius fetg pintga, ed havend piars sco tut il muvel en ina gada, sch’eis ei ad els era buca pusseivel da segidar; plinavon fa la sura suprastonza da saver che sut ils 2 da fevrer hagi la lavina smaccau ensemen la casa da Vigeli Werth a Selva cun tuttas mobilias etc., il donn schazegiau ei 375 frs., quest ei ina famiglia zun munglusa, dus fargliuns, cun bab e mumma che san luvrar nuot e stuevan ussa vegnir susteni dalla vischnaunca, aschia ch’els ein ussa effectivamein bess ora sin gassa senza tetg e senza tut. Questas duas famiglias vulan encurir agid tier la cassa d’agid dil cantun, per quella fin eis ei aber necessari ch’ei vegni priu si in stir el cumin tenor §6 dil regualtiv dalla cassa d’agid, schiglioc vegn ei da leu anora prestau negin agid.
Essend ch’in ludeivel obercheit vegn buca grad ensemen e sa perquei era buca vegnir clamaus ensemen, sche ha il suttascret da sia autoritad anora s’elubiu da tarmetter ora allas vischnauncas da prender si in stir per quels, ni da dar in ton ord buorsa da vischnaunca, ni sco ei plai a scadina vischnaunca da dar igl agid, era cun specificar tgei che mintgin duei survegnir, ni co igl agid daus duei vegnir repartius. Sigl avegnent eis ei necessari ch’ei vegni lubiu en tals cass da tarmetter ora sin las vischnauncas per tals stirs, schiglioc savessen nos vischins da cumin buca sefar participeivels digl agid che vegn ord la cassa d’agid.

Recumandond la caussa cauldamein alla ludeivla suprastonza, sco era spetgond sin ina sperta evomaziun e risposta, sinaquei ch’igl ulteriutr sappi daventar tonpli gleiti, resta cun la duida stema
il mistral en uffeci A. Condrau
Mustér, ils 28 da fevrer 1850


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img06.jpg