Pervia dil decret dil ludeivel cussegl dils 24 da zercladur 1836 davart regulaments digl uaul, ha signur amtstatthalter sin ils 5 da fenadur medem onn clamau tier cussegl in signur gerau per vischnaunca cun sia grazia revendissim monsignur avat, ed han allura dau sequent pareri allas ludeivlas vischnauncas da nies cumin, sco era per ils particulars e corporaziuns che pudessen tras quei decret vegnir tuccai.

1836 Tujetsch Protesta encunter ordinaziunsIl signur amtsstathalter deigi far vegnir tier ad in ludeivel Cussegl Grond sin via adequata, seigi tras nos signurs mess, ni tras il ludeivel Cussegl Pign, sequenta formala protesta encunter il numnau decret, cun las cheu speras annexas raschuns.
Cun displascher zuar stoppien nossas vischnauncas dil cumin en massa ed en particular, sco era las corporaziuns e particulars als quals il numnau decret pudess zacuras ira tier, protestar formalmein encunter quel e declarar che d’in tal decret savessien nus buca restar suttapost e stuein plitost porscher dretg e quei per las sequentas raschuns:
Nus vesein bein en che uauls drovan schanetg e regualments empau pli buns che tochen encheu, aber quei tut duei e sa daventar sin ina moda che buca pregiudicheschi la segirezia dalla proprietad, sei da vischnauncas, corporaziuns ni da particulars. Tras il sura decret aber secartein nus en nos dretgs da proprietad e sez violai, e seresolvin fetg d’haver en favur da nies meini ina autoritad da peisa, numnadamein il ludeivel Cussegl Grond d’anno 1822, il qual en siu decret da quellas varts ed il qual onn ei vegnius participaus ella medema sura questiuneivla circulara sut lit. B confirmescha nies meini.
Leu ei clar detg, che en cass ch’il ludeivel Cussegl Grond, pervia da tagliar entirs uauls ordinaris, zatgei che la cunterpart vulessi buca acceptar, sche stoppi ei vegnir decidiu tras in derschader nunpartischont e metter aunc la raschun vitier. Pertgei cheu setracta ei da dretgs da proprietad, gie segir cura ei setracta da proprietads sto ins a quels ons star empau pli da lunsch che passar memia datier; ei zuar ver che enqual gada sto la proprietad particulara vegnir restringida per tuttavia prida naven, aber quei dueigi adina daventar cun indemnisar il proprietari ed en cass buca perinadad vegnir spruchigiau tras sentenzia giuridica, ton la necessitad sco l’indemnisaziun.
Pertgei plaida il decret en questiun nuota d’indemnisaziun? Pertgei buca indemnisar in proprietari dil donn ch’el pudess pitir tras stuer schar exister in uaul, ni entras buca puder tagliar a siu plascher per raschun ch’ei pudessi far donn alla tiara, ad ina cuminonza ni ad in particular? Surtut che tala proprietad ei da vegl enneu gudida libramein e senza grevezias, tgi che vul grevezias metter sin auters, paghi persuenter, edirschader vegnir schon vender.

Igl art. 4 dalla constituziun cantunala di clar ch’il reglament ch’il Gemeinwald audi allas vischnauncas e lur obercheit, uauls ein bein era dil Gemeinwald, aschia per vuler midar quei sto il sura artechel emprem vegnir tras il pli dallas vischnauncas midaus e per allura sto vegnir midau d’ina maniera ch’ei vomi buca encunter ils dretgs da proprietad d’in tierz e quei artechel ei clars, en consequenza suonda ei era clar ch’igl artechel 8 buca detti enta maun al Cussegl Grond da guvernar, regular uauls da vischnaunca ed aunc meins da corporaziuns e particulars, sco era autras facultads da tals, quei ......... selai absolut buca capir da puder guvernar regular raubas proprietad d’auters, che sulettamein quei ch’ei dil cantun en cuminonza; la continua pratica muossa era clar che quei seigi mai stau entellgiu en quella moda sco ussa vuless vegnir mess ora; e sco il Cussegl Grond d’anno 22 era clar ha explicau.
Sut tetel da polizia vegn sche Dieus vul bein era buca esser entellgiu da puder far tals pass che han negin exempel, e contradien alla segirezia dalla proprietad, ch’ei il fundament dalla societad. Co ils dretgs da proprietad vegnien tras il decret menau en prighel resulta denter auter era ord il paragraf 3 lit. A che di il Cussegl Pign dueigi haver l’incumbensa d’invigilar ils uauls dall’emprema classa e da puder obligar ils particulars „zu einer forst...... Lawinenaufforstung“, quei las reglas dil Kunst, ni reglas da scola digl uaul e munccond ils particulars da quei far, sche dueigi il Cussegl Pign quei far e zuar sut in adequat strof sch’ei suonda buca las ordinaziuns; ed era ch’ei rugaleschien ils uauls sin ina moda che porti meins prighel, quella damonda fuss inton pli raschuneivla, aber ei sto dasperas era vegnir tedlau il proprietari da quellas varts, e sin la dretga via duei quel vegnir obligaus aschilunsch sco gestadad seigi che vegni ad el enconuschiu tier indemnisaziun ni buca.
Il medem sesclarescha si era ord il paragraf 7, quel di co turnar plantar en ils loghens, co tagliar da cheu naven etc. Vegn il Cussegl Pign suenter haver udiu il rapport digl inspectur, fixar tgei seigi da far e quei lura communicar als respectivs proprietaris per quei observar; veramein per Grischuns quitein nus che quei seigi decretau bia, il pauper proprietari, seigi vischnaunca ni mo in particular, quel empiar’ins nuota, ins teidla igl inspectur ed ordeina e nunfagend castigia ins el, sco sedi "ohne ..... ..... .... ... ... ..." .
Ei era d’observar che seigi buca da far mo per il present fatg, lai ins ina gada tier che stetti en l’autoritad dil Cussegl Grond da far tals decrets, sch’ina autra gada po suandar tal d’ina autra natira e vegnin enstagl restar democrats, sa ins buca tgei e quei finalmein va tier aunc dalla Cadi sco ad auters cumins, a nus ussa buca commembers dil Cussgel Grond present, sco als honorai commembrs presents, dal qual ils biars portan il bia la sort dalla cumina glieud dil cantun, con nus insumma ei convegnaus tut da restar democrats e d’untgir tuts principis che pudessen cheu purtar donn.
Sut tetel d’ugadia vegn carteivel in ludeivel Cussegl Grond era buca vuler prender quest decret, cartein buca ch’el havessi ils dretgs d’ugadar igl entir cantun, numnadamein la vischnaunca, corporaziuns e cun particulars ed els ch’ein era dil cantun lura esser igl ugau; insumma quei han ei carteivel buca fatg sut quella presumziun e mettend il cass ch’ei havessen zatgei pauc ni bia da quellas varts la cardientscha da haver autoritad, sche stat ei nuota schi mal ed il prighel buca aschi gronds ch’ins vegni tondanavon a vender uaul, che nossa tiara vegni in desiert. Dieus ha bein aunc oz il di era dau ferstan e la naturala carezia pils avegnendsuenter ei aunc buca ord ils cors dalla presenta generaziun ragischada, nus cartein ch’era la ranvaria ed engurdientscha da daners vegn d’in temps sclariu si sco il present ei schon vegnir dumignada, gie ei vegn schon ussa generalmein plidau ch’ins stoppi haver quitau dils uauls, laschaian empau sura quei fatg a cumins e vischnauncas e particulars, ei vegn schon a vegnir bufatgamein rugalau e memia gronda accuratezia ei per nus Grischuns ina mulesta nunsupportabla, nus essan buca disai vid pass aschi gronds; era dueigi ins reflectar en lavur, quei vegness a dar ad in ludeivel Cussegl Pign e Grond ed ad auters e contas spesas vegnessen ad ira si per quei alla tiara.
Per in ton promover il beinstar dils uauls savess ins metter tier il decret d’anno 1822 che avon che tagliar in entir uaul, ni remarcablas strechas, stoppi ei dil proprietari vegnir notificau ad in ludeivel Cussegl Pign e lura dend questiun, sche salvar il schiedsgericht sco quei Beschluss plaida, cheutras vegness schon in bienton gidau, pertgei mo cura ch'ei vegn en lamentaschuns plaida schiglioc il Beschluss e quei susura pli franc sco nossa proposiziun cheu metta aunc plirs proprietaris e cussegls per megliurament digl uaul, vegnin nus tedlar cun plascher, aber adina ch’ils dretgs da proprietad e da nossa libertad vegnien buca violai e per quei duess adina vegnir fatg onz da meins che dapli per buca violar tals dretgs.
Fuss segiramein era bien da schar ira in um entelgeivel sin spesa dil Ausfuhrzoll dalla lenna pil cantun entuorn, che dessi indrezs co rugalar e migliurar ora igl uaul en nossas vischnauncas e particulars vegnessen segir a retscheiver in tal cun plascher e cun engraziament da nossa ludeivla regenza, cheutras vegnessen segir promovidas biaras bunas reglas da quellas varts, da part dils proprietaris dils uauls, aber in ludeivel Cussegl Grond sa schon, nossas vischnauncas e particulars vulan haver l’autoritad sezza da puder ordinar e vuler negin sforz, aschia ein ei en possess da vegl enneu e dapli stuein nus era declarar che nus buca selaschien en responsabilitad pervia da buca dar en la cuota digl uaul vendiu, pertgei nus protestein encunter igl entir decret e Verordnung sch’ei vegn aunc mess avon e mussau ch’ei seigi necessari pil beinstar public e che quei porti a nus negin donn ni vid rauba ni vid libertad, sche sa ins silsuenter quei reflectar da esser segirs, che vegni daventar quei che s'auda.
In ludeivel Cussegl Grond havein nus speronza che prendi nossa protesta suenter haver tedlau nossas raschuns e buca prender en malapart, ton pli che nus pudein segirar che tut vegni d’ina preschuasiun ferma da dretg e giustia

Gion Michel Flury
scarvon en uffeci


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0326.jpg