Lavina da Giuv, ils 25 da december 1836
Circa allas quater suentermiezdi ei schabegiau a Giuv sut il Culmatsch in trest cass, che ha contristau ils habitonts da Rueras. La lavina ei vegnida giu entochen alla caplutta da s.Bistgaun, ha destruiu siat clavaus cun entirs muvels biestga, dils quals 20 armauls ein vegni smaccai e stenschi. Mo quei ei buc avunda! Tschun stupents mats ein vegni curclai dallas nevadas: Hans Giachen e Gion Antoni Decurtins, dus frars, che han giu la ventira da plaunlur sez puder sefuritgar ord la lavina; item Giusep Maria Monn e siu frar Giachen Antoni, Giusep Luregn Schmed, ensemblamein cun Martin Valier, treis giuvenots, ch'eran en zona e pervesevan las nuorsas, han giu avunda da vegnir satrai vivs. Giusep Maria Monn udend a tschintschond sur el ella neiv, ha griu e saviu vegnir excavaus aunc quei di. Mo meins cletg han ils auters treis giu. Cura che Giusep Maria ei staus liberaus da sia freida fossa, ha el detg siper ses liberaturs: Martin Valier, ch'era en nuegl cun mei sto esser morts, pertgei che jeu hai clamau el, mo negina risposta. Sin quei han ils presents detg: Sch'ei stat aschia, sche mein nus per oz en num da Diu a casa, pertgei ch' igl ei gia stgira notg. Il Valier denton viveva aunc ed udeva era plaid per plaid tut quei che vegneva plidau sur siu tgau. Udend ils davos plaids, ha el griu e burliu sc'in ch'ei curdaus ord la grazia da Diu; gie, el ha perfin mess dus dets en bucca e schulau quei ch' el ha pudiu, per ch'ei po vegnien en agid. Mo tut adumbatten! Ils buns vischins udend buca stec sut lur peis, ein serendi miez ventschi encunter casa.
O tgei tresta sort! Tgi less pesar, tgi miserar las anguoschas dall'olma e las dolurs dil tgierp, che quei pauper carstgaun ha suffriu quella notg? Il Segner ha denton exaudiu ei. L'auter di, ils 26, han ins excavau vivs il Valier, schebi ch'el era serraus cun las combas denter dus quaders dalla preit-nuegl, che quellas eran tut smardigliadas; cunzun ina! Tgei stermentusas dolurs! Tgei situaziun! Sias combas ein mo pli in frust carn: u ch'el miera, ni ch'el sto schar amputar omisduas combas!
[ Pli tard, ils 28 da zercladur 1839, scriva in auter maun la sequenta remarca sigl ur dalla cronica: Oz hai jeu viu el a Mustér, mo en tgei miserabla situaziun! Siu pei dretg ei amputaus entochen schanugl ed il seniester san ei buca curar. Tgei pupratsch! digns da tutta cumpassiun! ]

Martin Valier ei denton mitschaus culla veta, ha empriu pli tard da fravi d'irom e cuntschacazzettas; ei maridaus, ha giu diesch affons e vegnius vegls, malgrad sia ruina corporala. (Jeu hai rimnau interessantas notizias sur dad el e vegnel in di cun caschun a far enzatgei ordlunder).
Il medem di han ei excavau morts Giusep Luregn Schmed, ch'era vegnius sturnius d'in quader, sco ins ha saviu constatar. E suenter ei era Gion Antoni Monn, ch'era stenschius e ch'ins ha buca pli saviu clamar en veta...
Acta capitualria et simul Chronica Monasteri Desertinensis ab anno 1821-1837 Tomus III; pag. 177 ff.

Lavina maletg Bleuler

 

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0347.jpg