1825 Tujetsch Dertgira

Protocol dalla dertgira da pasch dalla ludeivla vischnaunca da Tujetsch; ha priu sia entschatta igl onn 1825  
(pagina sco PDF)

Regulativ per igl obercheit da vischnaunca
Tier tuttas ordinarias ni extraordinarias radunonzas ch’igl obercheit sto seradunar per fatgs d’economia ni auter, seigi per stabilir regulativs, uordens sco castigiar ni auter ….. obercheit sto tenor siu uffeci per sarament ... vegnir ensemen, duei mintga commember esser obligaus da cumparer exactamein mintga gada e sch’in commember ha buca stgisa sufficienta e cumpara buc, sche croda in tal en castitg da 2 fl. per in di.
1847, ils 22 da zercladur
Christ Wenzin, gerau

Tujetsch, ils 7 da december 1825
1825 Tujetsch Dertgira CurschellasCumpara avon la dertgira da pasch Balzer Antoni Curschellas e plonscha ch’el hagi luvrau a Giachen Mudest de Ragisch per siu „Taglohn“, e fatg quen cun Giachen Mudest e sia pagaglia hagi purtau 52 fl. 52 xr. Sco de Ragisch confessa ussa pia, garegia Curschellas ch’ina ludeivla dertgira constrenschi Giachen Mudest tier siu pagament. Giachen Mudest de Ragisch pretenda, che Balzer Curschellas stoppi prender sia pagaglia nua ch’el hagi luvrau e possi buca vegnir tier el, damai ch’el hagi teniu ora, ch’el stoppi prender nua ch’el hagi fadigiau ed enqueri per las spesas. Omisduas parts, aber ein vegnidas neunavon cun neginas emprovas, ni perdetgas. Sin quei eis ei vegniu enconuschiu cun dretg e sentenzia che Giachen Mudest de Ragisch seigi obligaus da pagar la pagaglia ch’el ha fatg quen cun Curschellas e che Curschellas seigi nuota obligaus d’ira sin enzatgi auter. Ultra dalla pagaglia duei Giachen Mudest aunc stuer per spesas pagar al Curschellas 1 fl. 40 xr., don dretg als derschaders e salter 4 fl., per scriver protocol - 30 xr alla part dalla risposta.
signur mistral Beer p.t. gerau
signur statalter Thomas Beer p.t. gerau
signur Hans Giachen Gieriet p. t.
Giusep Antoni Bruccer, salter p.t.

Tujetsch, ils 28 da schaner 1826
1825 Tujetsch Dertgira ZanettiCumpara Vigeli Giusep Zanetti e plonscha encunter ils Mugglis, ch’han baghegiau la resgia vil Drun, numnadamein statalter Giusep Antoni Muggli e Leci Antoni Muggli, ils quals manegian da ver ils dretgs da menar ora aua ton sco els vulan per lur basegns, ed el seigi da quei buca cuntents e protesti encunter.
La risposta aber manegia d’oz buca saver rispunder e garegia ina suspensiun entochen la vischnaunca seigi buca vegnida rimnada, ed els sappien haver lur raschuns da proponer etc.
Ei ordinau dils signurs geraus da conceder la damonda da suspensiun e damaun dueigi la ludeivla vischnaunca vegnir rimnada e tarmess ora entras quels che hagien dumandau la suspensiun, per incumet 1.20 fl. per part ed alla part dalla risposta aunc 1 fl. ni per la suspensiun; per scriver a protocol ei cumpigliau en ils 1.20 fl.
Duri Battesta Beer
Tomas Beer
Hans Giachen Gieriet

Tujetsch, ils 28 da schaner 1826
Ha Gielli Sievi citau avon dretg Giachen Modest de Ragisch pervia da quens etc. etc.
Giachen Modest de Ragisch pretenda oravon ina segironza dil Gielli Sievi avon ch’ira cun el denten dretg ed ei vegniu sur da quei in …urthell ed ei enconuschiu ch’il Gielli Sievi seigi quella buca obligaus da metter.
Gielli Sievi ei cumparius cun segner sur Camenisch per siu defensur e la part dalla risposta ha quei buva vuliu schar tier, ei era fatg sur da quei in …urtell che sche la part dalla risposta vegli schar tier per oz quei, sche seigien quels signurs derschaders cuntents da schar tier senza negin pregiudezi; ed ils signurs geraus vegnan a proponer avon in ludeivel obercheit da cumin, sche quei dueigi vegnir schau tier aunc dacheudenvi. Sinquei ei la cuntrapart stada cuntenza.
Denton metta il signur defensur siu plogn e plonscha che Giachen Modest vegli buca esser cuntents da pagar al Gielli in quen da 8 fl. 32 xr. ch’ils signurs geraus obligeschien el tier quei pagament.
Signur mistral Wenzin sco defensur dalla part dalla risposta rispunda che Gielli Sievi hagi empermess da buca vuler insister sissura, sche Giachen Modest possi dir per sia cunscienzia ch’el hagi pagau, il qual Giachen Modest possi era dir, ed hagi detg.
Il plogn manegia aber ch’els erien buca totalmein perina, ed aschia sto il dretg ira vinavon, ei sur da quei fatg in …urtel, sin il cussegl schon daus oravon dils signurs geraus dallas parts sepassar ensemen e secunvegnir denter ellas, sche seigi ei aunc ussa las signurs derschaders buca vegniu dau ina precisa risposta cun cuntentientscha d’omisduas parts che quellas seigien perina ed aschia dueigi il dretg ira vinavon.
Ei pia vegniu schau tier emprovas e perdetgas alla part dil plogn gl’emprem ed alla part dalla risposta suenter.
Sin quei eis ei vegniu allegau per perdetga dalla vart dalla risposta signur assisent Caveing, il qual depona che Gielli Sievi hagi detg che sche Giachen Modest de Ragisch possi dir per sia cunscienzia ch’el hagi pagau, sche pretendi el nuot, e Giachen Modest hagi detg ch’el quei possi dir.
Il plogn fa endamen alla perdetga sche ella seregordi era che Giachen Modest hagi acceptau quella offerta ni buc, tgei Giachen Modest hagi patertgau poss jeu buca saver.
Alla fin suenter ditg e liung ver mess replicas e cunterreplicas ein las parts pervia dil quen vegnidas perina denter ellas e damai che Giachen Modest de Ragisch hagi sedeclarau sco la perdetga hagi dau, sche desisti Gielli da sia pretensiun. Ei surdau la spruchigiar sur dallas spesas ed ei vegniu enconuschiu ch’il plogn duei pagar alla risposta per spesas 1:40 fl. e per incumet als signurs geraus e salter 3:20 fl. e per scriver protocol 20 xr.
Duri Battesta Beer
Thomas Beer
Hans Giachen Gieriet

Tujetsch, ils ...
Cumpara avon ils suttascrets signur statalter Paul Giusep Wenzin e Schimun de Curtins e han plonschiu encunter il Bistgiaun de Curtins cun ses pursanavels ed han garegiau ch’ei vegni tras dretg e sentenzia enconuschiu che aschinavon sco Bistgiaun de Curtins cun ses pursanavels seigien seprevalai da secollocar ora il Crest d’Alp cun sia caschada e zuar senza dretgs ed encunter uorden da nossa ludeivla vischnaunca, sche garegien els ch’ei vegni tras sentenzia definitivamein constrenschiu ch’il detg Bistgiaun cun ses coninteressai stoppien turnar en Val Giuv e secollocar enten il medem liug ch’ei seigien stai secollocai l’entschatta dalla stad cun protesta dallas spesas.
Sin il plogn menaus, dat statalter Plazi Riedi cun Bistgiaun de Curtins en risposta ch’els secreigien d’haver giu dretgs da far quei ch’ei hagien fatg e ch’els quentien da nuota haver cheutras fatg encunter als uordens existents e ch’els seigien stai necessitai da buca saver star leuen per munconza da plaz, cun protesta encunter tuttas spesas.
La part plonschenta ha replicau ch’era ils auters pursanavels da Cuolm da Vi, che seigien da present en Val Giuv hagien sedeclarau ch’era els garegien che la fatschenta mondi vinavon e che quels garegien ch’ei vegni constrenschiu ch’ils da Crest d’Alp stoppien turnar anen etc. – e ch’els secreigien d’en vertit dalla cunvenziun fatga igl emprem onn per tuts quater onns denter tut ils pursanavels da Val Giuv seigien ei era obligai da stuer secollocar nua ch’els seigien stai l’entschatta, la quala cunvenziun ei quentien da saver far ver cun emprovas. Sin quei eis ei vegniu dumandau las parts sch’ellas seigien seresolvidas da schar dar sura dalla vertenta questiun ina sentenzia definitiva ni mo schar dar in proiect d’amicabel? Las parts aber ein sedeclaradas ch’ellas veglien ina sentenzia definitiva.
E aschia vegniu allegau per perdetga dalla vart dil plogn Giusep Antoni Brucher, il qual era pursanavel dalla caschada da Cuolm da Vi. La part rispondenta ha oponiu encunter quella perdetga, ch’ella secreigi ch’en vertit dalla declaronza dada dalla part sezza possi il Brucher buca vegnir admess per perdetga, essend ch’ella secreigi ch’ella seigi part etc. -
Sin quei eis ei entras …urtheil enconuschiu che Giusep Antoni Brucher possi buca vegnir admess per perdetga e quei zuar en consideraziun dalla declaronza dada, ch’era quels pursanavels da Cuolm da Vi che seigien aunc leuen hagien sefatg part.
Finalmein eis ei sura dalla principalitad enconuschiu entras sentenzia definitiva, suenter haver giu mess plogn, risposta, replica e cunterreplica
1mo. Che sin la declaronza dalla part rispundenta, ch’ella vegli turnar en Val Giuv cun la sia caschada, sche la caschada plonschenta vegli scumiar tegia, ed aschia stetti ei sura alla part plonschenta da scumiar quella ni buc.
2do. Nunvulend scumiar la tegia la part plonschenta, sche possien ils pursanavels dalla part rispondenta restar cun la sia caschada ora Crest d’Alp, bein aber possien ei mai puder catschar ord stavel avon che quels enta Val Giuv ed aschia era il medem cun catschar a stavel, sco era dueien quels da Crest d’Alp esser obligai d’adina stuer pascular cun quels da Val Giuv e nua che quels mondien cun la sia s.h. biestga ensemen.
Dond dretg priu giu allas parts miez per ina 3 fl. 20 xr. e 40 xr per scriver ad protocollum.
Suenter esser stau legiu avon la sura sentenzia, ha la part plonschenta garegiau da metter ad protocollum ch’ella resalvi da siu temps agitar per las spesas, ton giudizialas sco extragiudizialas.
Johan Jacob Gieriet
da quei temps gerau

Tujetsch, ils 29 da d’uost 1829
Secumpara Giachen Andriu Hendri e Giusep Maria Hendri e meinan in plogn encunter il siu frar Duri Vigieli Hendri pervia da siu dretg d’in ladretsch leu sper casa, il qual secrei e manegia ch’enten la partiziun seigi stau cundiziunau.
Il Giachen Andriu cun siu frar Vigieli Hendri han suenter haver duvrau las formalitads plonschiu encunter il siu frar Duri Vigieli, ch’els secreigien e pretendien che siu frar hagi gudiu e ussa pretendi per dretgs da puder guder il baghetg leu sper casa ton dil nuegl sco dils treis muns in d’in ladretsch; il qual els seigien buca cuntents e quentien da puder far ver cun perdetga, ch’el hagi dretgs mo dil nuegl e buca dil clavau.
La part rispundenta ha sin quei rispundiu I: numnadamein Vigieli Hendri en num da siu frar Duri Vigieli ch’el secreigi e pretendi che siu frar hagi buca mo dretgs dil nuegl, sonder era dil clavau e seigi avon che la partiziun daventi cundiziunau che quel che hagi il mun dalla Nacla hagi era ils dretgs dil nuegl clavau leu casa.
Sin quei ha la part plonschenta deponiu per perdetga signur Thomas Beer e suenter haver dumandau la part dalla risposta; sch’el hagi da far encunter a quella perdetga enzatgei (: a quella nuota stau enconuschent da quellas varts :).
Sche ha signur Thomas Beer deponiu en fuorma sco suonda.
Ch’el regordi perfetgamein bein, che damai ch’el seigi staus tier quella partiziun, ch’ei seigi vegniu claramein cundiziunau avon che trer las sorts e suenter esser stau mess giu ils muns, che quei mun che survegni il mun da Nacla, hagi era part dil nuegl leu sper casa, aber dil clavau buc.
Suenter da quei ha la part plonschenta era aunc mess vitier e serrau enten dretg, che protesteschi encunter tuttas spesas e cuost che mondien da quellas varts ed encuntercomi la part rispundenta ha quellas resalvau, relaschau las parts.
Sentenzia
Suenter haver tedlau plogn e risposta, perdetga e replicas eis ei entras dretg e sentenzia definita (: e zuar tras sentenzia definitiva en consideraziun che la part rispundenta ha allegau ch’in tal ladretsch seigi buca pli valeta che 15 fl. :), enconuschiu ch’il Giachen Andriu e siu frar Giusep Maria hagien obteniu il plogn, ed aschia la pretensiun dil Duri Vigielli Hendri senza fundament. Las spesas giudizialas deigi il Giachen Andriu prender giu 50 x ed il Duri Vigielli 1 fl. 40 x., cumpigliau en il scarvon e protocollem.
Duri Batesta Beer, gerau
Johann Jacob Gieriet, gerau

Tujetsch, ils 29 d’uost 1829
Ei cumparius Crest Antoni Mucli avon dertgira ed ha plonschiu encunter Giuseph Maria Degonda ch’el dueigi star neunavon e far ver tgei dretgs el hagi da metter en fein si Cungieri en siu clavau, ni che deigi star giu da quella pretensiun.
Sin quei ha il Degonda sco part dalla risposta pretendiu ch’el hagi retschiert il prau dil siu sir l’entschatta senza baghetg ed ha detg a siu sir ch’el hagi quei prau bia memia car e sin quei hagi quel detg ch’el possi metter en ed el pretendi per dretgs dils quater muns in dil clavau.
Sin quei ha la part plonschenta allegau il Giachen Modest per perdetga ed el ha dumandau si ch’el dueigi di sch’il de Gonda hagi era dretgs da quei baghetg; suenter haver admoniu il Giachen Modest ed quel aminau da dir mo la verdad ed agli dau il sarament entras il Gand……. ha il Giachen Modest deponiu sco suonda:
Giachen Modest de Ragisch depona sco perdetga, ch’el sappi dir nuot, ni ch’el hagi dretgs da quei baghetg da Cungieri ni ch’el hagi buc, bein aber quei sappi el, ch’il de Gonda hagi igl emprem onn ni il secund onn ch’el hagi giu quei prau dumandau el da schar metter en clavau il fein da quei funs ch’era staus dil Caviezel p.m. e sin quei hagi el detg al de Gonda, sche hagi buca clavau da metter en ed il de Gonda rispunda che hagi mo retschiert il prau e buca baghetg, il baghetg audi tier tschei funs ni prau, el laschi aber entochen ch’il sir seigi morts e lura pretendi el per dretgs; quei sappi el ch’il de Gonda hagi detg ad el.
Sentenzia definitiva
Suenter tedlau plogn e risposta, perdetga e replicas eis ei entras sentenzia definitiva vegniu enconuschiu che la part dil plogn hagi gudignau il plogn e la part dalla risposta hagi aschia fatg quella pretensiun senza fundament.
Las spesas giudizialas ein 2 fl. 30 x., las qualas il Giusep Maria de Gonda deigi stuer purtar giu, cumpigliau en il scarvon e protocollum. Las extragiudizialas duei scadina purtar las sias.
Duri Batesta Beer, gerau
Johann Jacob Gieriet p.t. gerau

Tujetsch, ils 21 da november 1829
Ein las sequentas ed undreivlas parts, suenter che quellas han giu observau las formalitads dil dretg, secumparen avon la dertgira pacifica per da quella tedlar il siu project da pasch sur dalla sequenta questiun, ed aschia sepresenta signur landama Christian Wenzin sco procuratur en num da Stiaffen Monn ed artavels da Gion Monn e zuar sco part plonschenta, ed ha menau in plogn encunter ils artavels da Paul Curschellas, numnadamein che damai, ch’ei vesien che quels stettien si e pretendien igl uaul sur il mises da Paul Curschellas (: quei seigi quel che stetti sur il funs che seigi staus da statalter Giusep Flurin Monn p.m. :) per siu agen, e veglien aschia sesurvir da quel tenor siu plascher, sche per quei seigi sia part necessitada da pretender che quella stetti neunavon e muossi si danunder il Paul Curschellas ni ses artavels hagein aquistau quei uaul, essend che quel seigi effectivamein dil Stiaffen e Gion Monn sco ei vegnien cul temps a far ver si e buca da Paul Curschellas ni ses successurs.
Sin il sura menau plogn dat il reverendissim ed ault studiau sur secretari, sco assistent dalla part rispundenta en num dils artavels da Paul Curschellas p.m. en risposta che, ordavon secreigi el e pretendi ch’encunter ina prescripziun u possess possi ei buca sut negins tetels vegnir schau tier, ni emprovas, ni perdetgas, ni documents e protesti aschia solemnamein; denton aber pretendi el che quei uaul, il qual seigi sura avon numnaus, seigi en verdad uaul ch’appartegni tier als artavels da Paul Curschellas, e zuar principalmein en vertit che quel seigi vegnius circa 37 onns gudius e possedius ruasseivlamein senza negina cuntradicziun u impediments, ed aschia sappi quel buca vegnir enconuschius tier ad enzatgi auter che als detgs Curschellas; cun protesta e resalvada ch’en cass che la sia part mantegni siu dretg pretediu stoppi il Stiaffen Monn resarcir tuttas spesas etc. etc. –
Suenter che las parts ein stadas passsadas giu, eis ei „einhelig“ vegniu concludiu da dar allas respectablas parts il sequent project da pasch.
Project da pasch
Che damai ch’il fatg seii aunc buca avon nus vegnius sclarius si, essend omisduas parts sedeclarai da far ver cun emprovas e perdetgas e quellas aunc nunenconuschentas, sche duessien las respectablas parts prender in signur confident da Tujetsch per part, aber adina nunpartischonts, e tier quels dus confidents duessi ei aunc vegnir tratg tier il signur mistral Peter Antoni de Latour per „Obman“ ed allura dueigi ei tras quels treis signurs vegnir suenter haver udiu las raschuns d’ina part e l’autra da jure giudicau e dau la sentenzia ed aschia duei ei en vertit dil nies decret da cumin vegnir dau la declaronza en termin da 24 uras sche quellas veglien acceptar il present project ni buc. –
Per dond dretg u incumet dalla dertgira da pasch dueigi scadina part pagar 2 fl. cumpigliau en il scriver ad protocollum cun resalvada ina encunter l’autra.
Duri Batesta Beer, gerau
Joahann Jacob Gieriet, p.t. gerau e preses

Tujetsch, ils 13 da fevrer 1830
Cumparan avon ils suttascrets las sequentas ed undreivlas parts, numnadamein signur mistral Christian Wenzin sco „Anval“ da Giachen Modest de Ragisch e plonscha encunter signur statalter Thomas Beer sco part rispundenta, che damai ch’el vegli buca pagar il Giachen Modest tenor brev da marcau per la sia lavur fatga, ton dalla casa sco vid ils nuegls e clavaus, sche garegi quel che statalter Thomas Beer vegni tras il project da pasch cussegliau, che quel vegli seschar en e pagar sco avon ei menziunau, cun protesta e reservada encunter tuts cuosts e spesas.
Signur statalter Thomas Beer e signur scarvon Johann Baptista Monn sco part rispundenta, ed opponend al plogn menaus, ch’els en vertit dalla brev da marcau secreigien ei da buca esser obligai da pagar ad interim dapli che quei che Giachen Modest seigi schon pagaus, essend che quel hagi aunc buca finiu la lavur e dasperas secreigien ei era che inton da quella ch’el hagi schon fatg, seigi buca sufficienta e per quella fin aunc biameins la remessa, ed aschia secreigien els che Giachen Modest duessi biar onn esser ad els culponts da bonificar, ch’els ad el, cun protesta e reserva encunter tuts cuosts e spesas etc.
Suenter haver udiu plogn e risposta, replica e cunterreplica etc., han ins anflau per bien da dar ils sequent project, numnadamein:
Project da pasch
Che signur statalter Thomas Beer duessi ad interim I: zuar senza negin pregiudeci :I pagar al Giachen Modest 35 fl. en termin da 15 dis, dil rest aber duessi el ni cun ses coniteressai dar uorden ch’il material fussi sin il plaz talusia, che Giachen Modest sappi dar l’entschatta ussa, ed entochen S.Placi proxim haver finiu la lavur tenor brev da marcau ed allura dueigi ei vegnir priu in confident per part nunpartischonts e quels dueien giudicar da jure ed amicabel sur da tuttas questiuns che seigien dapresent, ni che pudessen entochen lura nescher, duessen quels dus buca saver vegnir tier la decisiun mo denter els, sche possien quels trer tier in Obman suenter sin plascher, aber adina nunpartischonts.
Appartenent tier la remessa, duei il present scret vegnir rendius anavos al sur Camenisch, e cura che la lavur ei finida, seigi quel autorisaus d’urentar il fatg e suenter siu beinmanegiar dar la decisiun tenor brev da marcau.
Priu giu per incumet allas parts 3 fl. 30 xr. la mesadad per part cumpigliau en il scriver ad protocollum cun regress ina encunter l’autra.
Sura dil present project duei ei vegnir dau la risposta al president en termin da 24 uras, sche quel vegni acceptaus ni buc, duess quel vegnir acceptaus, sche dueigien las parts esser obligadas da stuer star tenor il cuntegn da quel senza autras appelaziuns.
Duri Batesta Beer, gerau
Johann Jacob Gieriet p.t. gerau

PS. Suenter in cuort temps han omisduas undreivlas parts dau la declaronza ch’ellas veglien acceptar il project daus, ed el medem temps vegnidas perina da numnar signur mistral Peter Antoni de Latour per igl Obman.
Duri Batesta Beer, gerau
Johann Jacob Gieriet p.t. gerau


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img02.jpg