Contract da baghegiar casa - lavurs da miradur

Tujetsch, ils 7 da december 1825

Cheutras vegn ei fatg da saver qualmein ei seigi daventau in recli e sidretg marcau denter las undreivlas parts, numnadamein d’ina vart Gion Antoni Beer e da l’autra vart Gion Bistgiaun Decurtins.

Numnadamein Bistgiaun Decurtins surpren da far tut la miraglia che va vid la casa nova a Camischolas da Gion Antoni Beer, tut quei che fa da basegns. Ligiar giu ils mirs pegna e tgamin en ina cuschina, insumma tut, resalvond la platta da fiug e tgamin e pegna en l’autra cuschina, ei buca marcadau en quest accord.

Quella lavur tutta duei vegnir fatga buna, cumpleina e sufficienta ed era nua che fa basegns, ni che fuss buca sufficient, deigi vegnir rut giu e fatg si da niev. Quella miraglia aber che exista ed ei aber sufficienta possi vegnir schada la veglia. Tonaton deigi ei vegnir fatg ina buna e sufficienta lavur sin tuts mauns.

Per far la sura menziunada lavur s’oblighescha Gion Antoni Beer da pagar a Bistgiaun Decurtins, cura che quella vegn ad esser fatga anno 1826, in pagament da 40 flurins, dico curonta e pagar cun prender giu in capital ch’ei schon menziunaus. Nunsavend aber far quei, sche s’oblighescha Gion Antoni Beer da pagar il Bistgiaun Decurtins sez.

Quella lavur sto vegnir fatga silmeins ton che Gion Antoni Beer sappi habitar sin sogn Placi 1826 e finida sepudend sin sogn Martin da quei onn. Sch’ei fuss aber buca pusseivel sche entochen sogn Placi da 1827 sto ella aber esser totalmein ventschida senza reserva.

Scret per cumissiun dallas parts e legiu a quellas avon, las qualas ha la presenta scartira confirmau

In fede
Thomas Beer gerau
a mi ed als mes senza pregiudezi

1825 Tujetsch Baghegiar Miradur


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img03.jpg