05b 1823 Nalps Untgida

Alp Nalps da Magher pertuccont l’untgida a Plaun Cavorgia

Anno 1823, ils 23 da fenadur en Tujetsch.
Essend naschiu ina questiun denter ils respectabels pursanavels dalla Alp da Magher e la ludeivla vischnaunca da Tujetsch pervia dalla untgida dalla sura numnada alp, sche per untgir ora tuttas dispetas e malaveglias e per mantener buna amicezia denter vischins cunfinonts, sche eis ei entras ina cunvegnientscha amicabla vegniu fatg il sequent accord.

1mo. S’oblighescha la vischnaunca da Tujetsch da schar tier alla numnada alp in’untgida ora il Plaun dallas Cavorgias, la quala deigi s’extender sco suonda. Encunter il dutg oradem dil Plaun che vegn giu grad il clavau grond enta Nacla via sur via, encunter miezdi ils trutgs che vegnan giudem ils Neidis ora, la sera il dutg dadens il Plaun, mesanotg l’aua da Pardatsch.

2do. S’obligheschan ils pursanavels dalla alp Nalps da Magher da pagar alla vischnaunca da Tujetsch la summa da rensch treitschien en cefras 300 fl., il qual capital deigi vegnir tscheinsius sco in auter capital a 5 procent e croda emprem tscheins sin s. Martin proxim.

3tio. Deigien quels buca puder vegnir sin quella untgida entochen la neiv seigi buca tschentada ora giu la Punt Pardatsch e quei s’entelli sche la neiv vegn la damaun en lur alp e las vaccas san buca pascular dil di sche possein quels sin la sera vegnir ora cun las vaccas sin l’untgida, quei vul dir aber directamein vegnir sin quella senza schar pascular en auters loghens, sche la neiv vegn sera, sche deigien ei stuer star sin lur alp entochen la damaun.

4to. Deigien quels da Nalps buca puder ira naven da quella untgida entochen ch’els buca directamein san ira sin lur alp catschar vinavon lur tiers senza pascular sin nossa alp.

5to. Ei la vischnaunca patruna e po guder quei toc pastira sco ella ha gudiu entochen ussa e tiers che fussen buca sut pastur buca stuer, e quels da Nalps buca puder catschar naven. Tiers aber cun pastur deigien buca puder vegnir sin quella pastira duront il temps che quels da Nalps han leu lur tiers, resalvond en cass da basegns da puder ira atras per guder quei toc dadora il dutg dadora, per prender la malemperneivla maniera da vischins da Pardatsch fatga quest onn, cura pursanavels da Nalps han vuliu occupar per basegns lur untgida, che leu era cavals e vaccas leu sin quella untgida e negin speras, levan quels dustar, sche han ins anflau per bien che vischins da Pardatsch, ni tgi che havess tiers ch’audan sut pastur leu sin quella untgida, stoppien bandunar aschigleiti sco ei vegnien adverti, che pursanavels da Nalps vegnien cun lur vaccas aschizun ch’ils da Tujetsch seigien buca en via ni en ils trutgs cura ch’ei han da vegnir sin l’untgida e ch’ei seigien naven e giud l’untgida cura ch’els vegnan sin quella, e tener naven lur tiers entochen che ils da Nalps han buca cediu, sco la brev plaida.

6to. Tuccont tier il pagar ils sura stipulau pagament ei s’entegliu sco suonda, deigien ils da Nalps buca puder pagar giu 100 fl per onn e la vischnaunca buca puder far pagar pli che 100 fl per onn cun il tscheins vitier, l’emprema ratta croda da pagar sin igl atun digl onn 1823.

7tmo. En cass ch’ei fagess basegns da reparar ils trutgs da Pardatsch anora per ira e vegnir sin quella untgida, sche seigien ils pursanavels da Nalps patruns da quei far, buca aber la vischnaunca esser obligada da quei reparar, resalvond ch’ins sappi pinar lenna ch’ils trutgs vegnessien impadi sche deigien quels che peinan esser obligai da tagliar ora e metter ord ils trutgs.

8tvo. Deigi en cass che oz ni damaun vegness anflau documents vegls che muossan si che pursanavels da Nalps da Magher vessen giu untgida en in liug ni l’auter sigl intschess da Tujetsch, eis ei resalvau lur dretgs als pursanavels e deigi vegnir rendiu anavos ad els il pagament che la vischnaunca da Tujetsch retscheiva per la sura menziunada untgida.

9vo. Deigi vegnir fatg dus instruments conforms in da l’auter e mintga part schau enta maun in cun la suttascripziun da mintga part. Daventau di ed onn sco sura.

En num dalla ludeivla vischnaunca da Tujetsch confirman la sura scartira ils geraus da quei temps cun il sigil da vischnaunca e lur nums

Thomas Jos. Beer
Gion Antoni Caveing

En num da persunavels da Nalps da Magher confirman la sura scartira ils cautegias
Giusep Antoni Maissen
Crest Fidel de Sax


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img01.jpg