Uorden da vischnaunca dalla stad, fatgs igl onn 1814, ils 15 da zercladur. Duront il buca cargar ad alp.

1814 Tujetsch Uorden

Pareri d’in ludeivel obercheit d’anno 1814, ils 15 da zercladur, sur dils uordens e secuntener da scadin. Essend concludiu dalla ludeivla vischnaunca da buca cargar ad alp. Tuccond tier la stad.

1.mo Dueien tuts uordens dalla stad haver sia entschatta calonda fenadur.

2.do En vertit da quei pia dueien las nuorsas sin quei di era vegnir cargadas.

3.tio Vegn ei proponiu ch’ils cavals duessen vegnir cargai sil Tgom sut in pastur, cun la reserva che quels dils cavals possien sesurvir da quels, seigi sco per bos ni per auters basegns e duront quei temps ch’els ein naven dil pastur, possien sesurvir dalla pastira da casa, bein aber seigien ils patruns dils cavals obligai da tener ord donn.

4.to Tuccond tier il far pastur da vaccas e bos da casa ei schau sura a mintga vischinadi.

5.to Davart ils tiers casa dueien quels esser enferrai da tut temps e duessen ils s.h. (salvanoris) tiers casa vegnir pindrai buca enferrai, sche dueien ei ver la pindradira dubla, quei vul dir in batz per gada.

6.to Pertuccont ils firaus Perbon, dumengias e firaus da devoziuns, sco las sondas etc. vegn scadin admonius da frequentar ils sogns uffecis e buca negligir quels senza raschuns sufficientas, ed era senuspir da tuttas lavur da quels dis, scumandadas servilas e buca absolut necessaria. Dil reminent eis ei lubiu da puder purtar enqual caussa, latgiras sin quels dis a casa sia, en ina brocca ni brentetta sin maun. In ludeivel obercheit suppona ed ha speronza, che scadin hagi religiun e cunscienzia e sesprovi da salvar la lescha da Diu e dalla baselgia encunter speronza, aber sche enzatgi fuss aschi tievis ni forsa aunc aschi schliats da ver pauc ni neginas leschas, seigi dalla baselgia ni divinas, sche vul in ludeivel obercheit a garegiar per cunscienzia, che scadin che vesa ni sa da tals che cunterfan a quellas, seigi obligaus da rapportar immediat ad in ludeivel obercheit, sinaquei che quel sappi cuninagada d’in ludeivel obercheit, en cass da basegns, vegnir curregius, admonius ni strufegiaus tenor dalla grevezia surfatga.

7.timo Pertuccont ils donns, seigi cun schar ira per ils praus ils tiers, ni seigi cun far vias novas e senza dretgs, resta a scadin la via aviarta da puder s’indemnisar dil donn pitiu - mo eis ei resalvau, che en cass ch’in che havess pitiu donn u per respect human u per tema da stuer magliar ora ni per autras raschuns buca stgisas, ni less duvrar ils mettels lubi ed usitai per s’indemnisar dil donn pitiu, possi quei tal ni in auter denunziar ad in ludeivel obercheit ni era in ludeivel obercheit schar clamar da sesez il malfatschent per tenor meret, malezia, circumstanzias castigiar quel.

8.vo Duei il muvel da scadin restar ensemen, oreifer ils vadials.

9.no Las cauras dueien calonda fenadur vegnir a casa sut lur pastur general.

Quests ein pia paucs aber beinmanegiai artechels ch’in ludeivel obercheit cun cussegl dil revendissim segnerfarrer ha anflau da metter avon e proponer alla ludeivla vischnaunca, pertgei che biaras leschas paran schiglioc da buca esser emperneivel, sufficient ei aber a scadin tema da Diu, religiun e cun buna cunscienzia.

10. mo Il mises da Scharinas, Milez, Mulinatsch, Liez, Malamusa, Surprau, Valtgeva, Cungieri dueien esser entochen Sogn Barclamiu (24-08) senza caschadas, bein aber dueien ei suenter il sura fixau temps puder leu caschar e pascular las pastiras.

11. mo En mintga alp, quei s’entelli da Maun Sura, dueien ei ver in pastur general pils s.h. (salva l'honur) tiers da casa (salvanoris).

 

Il sura document ei en dubel avon maun. Alla fin dil secund sesanfla aunc la suandonta remarca:
(quei document sco pdf)

Pertuccont igl arvè anflass’ins, essend che quel vegn pagaus cun daners, da metter si tschun batz per vaccas schetgas e bletschas, excepidas fussen da quei pagar quellas che pagan igl arvè sco era quellas da quels vitgs che han buca envernau. La raschun da quei project ei che la vischnaunca sin d’atun ils sequents senza nunprovedi deivets ch’ein alla claustra senza la remessa 200 fl., il muser 90 fl., a mistral Cagienard capital 40 fl. e la questiun dil Stiafen pigurer ch’ei era leu pendenta e forsa aunc deivet da cumin. Tgei la vischnaunca ha da trer en sa ella sezza.

Salvanori Tschamut

Salvanori/piertg, dretg davostier Tschamut cul Hotel Rheinquelle, ella cavorgia ramura il giuven Rein Anteriur


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

0326.jpg