Unglück von Selva im 13ten Tag des Christmonats 1808
pader Placi a Spescha

Selva, il secund davos liug dalla Val Tujetsch ella Cadi, schai odem in plaun-paliu e buca lunsch naven dallas fontaunas dil Rein Anteriur. - Siu num deriva dal vegl retic, che vul dir: uaul (selva) e vegn aunc oz numnaus dals Uranes tudestgai: „Zum Holz", pertgei quei vitget era baghiaus egl uaul. - Il vitg da Selva, ch'era strusch serefatgs dapi il barschament da 1785 e ch'era dapi lu vegnius baghiaus tut da niev, veva ussa 13 casas-lenn e gest tons clavaus cun buns nuegls. Il vitget schischeva silla riva settentrionala dil Rein sin in rieven; el possedeva surasiviars in trit e rar uaulet. Selva ei in beneficiat cun baselgia.
Da neueneu ei il vitget staus smanatschaus da duas lavinas; d'ina encunter mesanotg e da l'autra encunter miezdi, da surengiu e da sutensi. Quella dal Rein sutensi stremblava e spurlava si il vitg bunamein onn per onn; ella tementava ils vischins e schizun sdernava per tiara quels che vegnevan memia datier; vargava denton il pli savens senza caschunar pli gronds donns che rumper en finiastras, derscher entuorn chischners e scarplir las slondas dils tetgs. - Quella dalla Val dil Plaun encuntercomi, quella da surengiu, mava savens cun baghetgs, cuvreva vi glieud e biestga e quei malgrad ils cugns-crap construi sur ils baghetgs per rumper la lavina, sco igl ei era stau il cass avon dus onns.
Ins sperava denton silla protecziun da Diu ed essend ch'ei deva gest el liug dil vitg ina bun'aua, bunas pastiras e tut il cumadeivel per- in'existenza da glieud e biestga, cartevan ins d'astgar viver en prighel.
Gliez unviern era la neiv in um aulta; ei suflava e cuflava senza fin e misericordia. Stgirezia e sclaridas anetgas sebrattavan giu e la fin finala fageva ei ton da selvadi, ch'ils habitonts han buca ughiau da semuentar ord casa quella sera, gnanc da perver e buentar.
Ei schabegia schiglioc buca da rar, cunzun a Tschamut, ch'ei sufla e cufla aschi vehement, che las cuflas, pugnond ina cuna l'autra, petgan fiug. Mo quella sera fagev'ei tondanavon, che tgi che leva buca stenscher e vegnir tschocs, steva a casia. La lavina meridionala, che schulava giud las Palas dil Ruinatsch e vegneva giu bunamein onn per onn, temevan ils da Selva buca quellas caussas, ed ein per quei motiv fugi lezza sera ellas casas giudem il vitg, ch'eran bein pli maneivel da quella, mo pli allontanadas dalla lavina sura, settentrionala.
Per carezia e quitau pil beneficiat dil liug: Peter Weller, han ils vischins supplicau el da vegnir cun els; el sappi gie bein aunc seregurdar, ch'avon dus onns, la lavina hagi cuvretg sia casa, la baselgia e sfraccau la casa vischina. El ha denton snegau quei beinmanegiau invit e replicau zun modest a sias nuorsas: La divina providientscha hagi destinau quella casa per el; el sappi subir il prighel cun ses vischins e banduni buca siu post.
Tgei sgarschur e stgiraglia notg; ils suffels burlevan e scadenavan cun vehemenza encunter las casas; talmein, che la cufla sefuritgava dalla pli stretga rusn'en. Ei veva dau las dudisch e stuschava encunter l'ina dalla notg. Ils vischins eran tgi iu a letg, tgi scheva rusari, tgi vegliava - che la disgrazia ei stada cheu!
La zun extendida, profunda e teissa Val Ruinatsch sedestacca e sesfuola cun vehemenza giuadora - e cun quella era l'aschi numnada lavina da Benaus! Omisduas sederschan giuadora cun stermentusa ramur, entochen giuaden el Rein, e leu s'entupond cun forza e sfraccass nundescrivibel, sesiettan ellas burlend ed urlond dal rieven Rein siadora. La davosa dat ina menada nunspitgada all'emprema, enviers mesanotg per liung ora; ellas contonschan domisduas il Plaun e sederschan cun vehemenza sul vitg en. Semanond ell'ussa aunc dalla vart meridionala suranora, ei la catastrofa cumpleta. Tut quei ch'ei en via va en scalgias e vegn el medem temps satrau. La tschaguola dalla tuor-baselgia e la crusch sgolan tras l'aria ensemblamein cun slondas e tetgals, che vegnan purtai entochen si egl uaulet sur il vitg.
Sis casas ein sfraccadas ensemen diltuttafatg; ina ei donnegiada ed in'autra ha buca fastitg da tetg pli. Tschun clavaus ein destrui radicalmein e ston vegnir baghiai da niev dal sulom alla crusch-spitg; dus sulets ein restai senza donn. 42 persunas, pia la mesadad dils habitonts ed in affon aunc buca naschiu, 37 armauls e circa 200 tiers manedels ein satrai sut la neiv e las ruinas dils baghetgs.
Il beneficiat cuora immediat giuadora, va vin baselgia e tucca il zenn da stuornas; quei um spir forza e vertid, che fa bunamein miraclas per libeberar sias nuorsas satradas vivas!
Ils Tschamuters che han udiu il rumplanem ed il zenn da stuornas, cuoran sut agen prighel da veta atras l'altezia nevada ed ein ils emprems silla plazza da disgrazia. Mo tgei ston els veser immediat? Treis da lur vischins cun biestga e tut sturni per plaun e senza enzenna da veta.
Plirs umens da Selva pervesevan lur muvels sillas aclas da Caspausa, ina mes'ura sur Selva encunter mesanotg ed han udiu nuot. Per l'auter di la damaun han ins pudiu dar sinzur ad els e scochemai ein ei curri tras las nevadas dallas plauncas teissas neu encunter Selva, senza schar dar el tgau, che era els pudessen mintga mument vegnir satrai dalla lavina.
Il medem di, che fuv'ina mesjamna, ei il plevon dalla Val Tujetsch, sur Luregn Schmed, cun tschuppel umens da leuora, semess sin via encunter Selva, mo essend la via stupada ed aunc adina periclitada dad ulteriuras lavinas, ha er'el stuiu ir a Caspausa, e per la medema via dils perveseders eis el finalmein arrivaus a Selva plein quitau e premura per sias paupras nuorsas. El era in um grev da sisonta onns e suava tut en in'aua, sco dis da stad ella pli gronda calira.
Treis umens ed in mattatsch han pudiu sedeliberar da sesez ord la lavina; 13 persunas ein vegnidas excavadas vivas e buca fetg donnegiadas; las autras han ins anflau mortas.
Rest Giusep Riedi, in um sil meglier e sia entira famiglia han stuiu passentar 15 uras sut neiv e crappa e senza saver magliar la minima caussa. El era mo en camischa. Els fagevan oraziun, seconsolavan, grevan ed udevan in l'auter bein e scoiauda, schebi separai in da l'auter. Plaunsiu han ins udiu lur vuschs, grend tuts el tact tgei ch'ei mo pudevan - ed els sezs en lur fossa udevan uss era ils cavaders. Ed uss han ins entschiet a cavar, mo vonzeivi ein ins stai necessitai da schar ira giuden ina resgia vid in sughet, sinaquei ch'il cau-casa sappi gidar a trer ella per arver ina ruosna, ch’ei possien siadora.
La tradiziun raquenta, ch'in buobet muncavi aunc; ins ha clamau el pil num epi hagi ei rispundiu frestgamein: „Ju sun ain pegna ad ai tgaud e bien!" Il buf veva pia bess il plat-pegna pli lunsch ed il pign che durmeva sin quella, ei daus lien - e nuota schelaus!
Gion de Plaz, in um da sisonta onns, zugliaus mo en in lenziel, ha luvrau uras ora ella neiv per liberar sesez e sia dunna, mo ha tuttina stuiu schar schelar ella. Anflond el miezmorts, tut steris e senza vusch, semiglionts ad in moribund, han ins purtau el en sia stiva caulda, scaldau si las solas-pei cun plattas-crap bunamein burnidas, epi eis el puspei vegnius neu e vivius. Naven dil mardis endamaun, che la disgrazia ei succedida, entochen il venderdis-sera, han ins excavau 16 morts. Mo co satrar tontas baras, cu ins saveva ni purtar ni menar ellas a Caspausa e la via anora era serrada e pli prigulusa che mai? La finfinala han ins fulau e cavau via en tut prighel da veta, e lu transportau las baras: tgi zugliai en lenzeuls e tgi mess danter aissas, cargai sin pliras sliusas da maun.
La sonda han ins satrau 19 e la dumengia las davosas 6 baras. Ins po cumprender cun tgei dolur e tristezia els cors dils presents! Cuolms e vals rebattevan dallas lamentaschuns dils zenns ed ils mirs santeri dal bargir e plirar dil pievelun en malencurada. E la ferdaglia era aschi recenta, che las larmas schelavan sin fatscha!
Pader Placi concluda allura sia descripziun cun ils plaids: Vegli po Dieus, il buntadeivel e misericordeivel, emplenir il cor dils concarstgauns cun commiseraziun ed ils habitonts dil vitg cun prudientscha, sinaquei ch'ils ins gidien els ed ils auters seresolvien da transportar lur habitaziuns en in liug segir.
(mira 16.147 versiun tudestga)


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img05.jpg