Cunvegnientscha ch’era daventada a Mustér igl 1806 denter vischins da TschamutTujetsch 1806 Tschamut
Anno 1806, ils 7 da schaner, han vischins da Tschamut cun il pli, serrau giu da prender si per quest onn s.h. biestga per cargar lur alp per 8 fl. per fiug. Il Toni Schmet, statalter Gaudios Riedi e Clau Sievi vesend, che quella conclusiun mava directamein encunter il da vegl enneu stabilisau possess, il qual fuva zuar da prender si cul pli dil vischinadi gl’interess, aber igl arvè vegneva adina partius suenter las s.h. vaccas che vischins envernavan sin lur territori dil vischinadi, han secuntermess ed opponiu encunter, sefundond sin il ruasseivel possess e la brev d’anno 1398, la quala deva claramein d’entellir, aschinavon che quella deva ils dretgs alla venerabla claustra, en munconza ch’ei vegness buca dau igl arvè en quella fixaus, da puder en qual clavau che ad ella plaschess leu Tschamut e sefar pagada vid la flur en quel, ni quels clavaus, che quels praus directamein fussen sco hipoteca da quei arvè, ed aschia per naturala consequenza duess igl interess, il qual vegneva recovaus da vischins ord quella alp u restar tier la veglia isonza da purtar suenter las s.h. vaccas; u silmeins a proposiziun da prau ed ers, sco mintga vischin posseda.
Dapia che la pluralitad da vischins insisteva sin sia conclusiun fatga e pretendeva da puder far quella ed autras a siu plascher; il Toni Schmet aber ed ils auters dus, manegiond che quei fuss ad els da memia grond pregiudeci da pia che els presentamein possedevan a porziun da vischins pli s.h. vaccas ed era praus ed èrs ch’ils auters vischins han schau cumandar la pluralitad da vischins da rispunder avon dretg ton per annullar la resoluziun prida ils 7 da schaner da prender si s.h. biestga per ils 8 fl per fiug, sco era per obtener entras sentenzia ina tschuncada per adina en vesta dalla meldigiada brev da concluder enzatgei che pudess ira encunter il vegl possess e la brev etc.

Per quel fuvan omisduas parts secumparidas e provedidas cun lur ugaus, documents oz cheu en Mustér per finir cun dretg questa fatschenta considerond aber che, sche quei vegneva entschiet cun dretg, quei havess dau ora ina zun spendiusa dispeta, la quala havess schendrau in cuzzeivel hass e malveglias denter quels paucs vischins, sco era ch’il cuors dil mund seigi, che oz ei in empau pli ferms e damaun in auter e per pli raschuns, sche han els perinamein desistiu dil dretg e concludiu e serrau giu ina cunvegnientscha adequata cun la brev veglia, la quala duei restar en kraft per adina, taluisa che dacheudenvi ni ils paucs ni ils biars dils vischins possien zatgei midar da quella sut negin tetel ni pretext la quala ei sco suonda.

1. Deigi la grevezia digl arvè, baghetgs e tuttas autras che pon ira vid l’alp vegnir partidas giu e purtadas suenter ils praus ed èrs che vischins

2. possedan leu Tschamut e per consequenza deigien era igl interess vegnir partius e possedius suenter praus ed ers, quei ei sch’ei vegn schau via, ni priu si s.h. tiers.

3. Deigi scadin vischin, quei ei mintga fiug, puder tener a casa ina s.h. vacca, sch’el ha agen envernau per mulscher, sco adina ei usitau e dapli deigi el aunc puder prender si ina schetga ni da mulscher ed era tenera casa.

4. Possi scadin vischin era metter tut ils auters ses tiers e guder l’alp.

5. Deigi mintga vischin aunc puder prender si annualmein in vadi ni in stierl, ni stiarla; il rest deigi vegnir cargau l’alp e partiu sco ei detg el secund artechel cheu sura; e quei vadi ni stierl duei vegnir cargaus ell’alp nua ch’ei cargan lur atgna biestga schetga.

6. Dil rest ton da cargar ad alp, ni guder mintgin ses tiers dapersei a siu plascher, sco era guder l’alp cun prender si tiers jasters, bein aber adina mo sco ei po purtar, ni schar via ch’els vessen davonz per lur biestga duei adina puder vegnir concludiu cun il pli da vischins, nua scadin vischin deigi puder dar siu meini.

E quei ei daventau en Mustér, ils 21 da matg anno 1806 e per confirmaziun da quei suttascrivin nus per cumissiun ed en preschientscha dils cheutier deputai da Tschamut

Tomas Berther sco ugau ed en num da Toni Schmet

Enten num dalla pluralitad da l’autra vart
sco ugau Gion Antoni Schmet

Sura document sco Copia d'ina cunvegnientscha che era daventada a Mustér igl 1806 denter vischins da Tschamut

15 da schaner 1806
Alla ludeivla vischnaunca da Tujetsch,
la proposiziun fatga da monsignur avat il di da Silvester, en num dalla ludeivla vischnaunca da Tujetsch entras il bein sabi signur mistral Gieriet e signur statalter Mucli, ei vegnida mess avon ad in venerabel capetel dalla Casa da Diu, il qual suenter ver madiramein reflectau sur tala nova proposiziun, en consequenza dalla quala ei vegness buca cargau ad alp en general, ha viu en che tenor exprienza massi quei en pregiudezi dallas olmas, sco ins era da quei avisaus buca mo dad in u l’auter spiritual, sunder er’ina gada d’in entir venerabel capetel dils pasturs dallas olmas staus admonius cun entardar ni tralaschar il survetsch da Diu dumengias e firaus, nua che nies stan spiritual laschi buca tier da concuorer ni cooperar leutier entras novas cunvenziuns che gidassen tier tal intent.
Sche ha in venerabel capetel concludiu buca per siu interess, sonder per buca dar caschun tier talas inconvegnietschas e cheutras sefar participeivels dil mal, da reservar il temps ad uras da consultar ses pli aults superiurs e prender giu da maun da quels en tgei e con lunsch ins sepossi schar en a siu temps e denton garegiar dalla ludeivla vischnaunca il sulet arvè en natira suenter dretg diever ed instrument cun rugar augurar, ch’igl altissim Diu vegli era quest onn dar sia grazia e benedicziun sin tuttas alps e schurmegiar igl onn vegnent il s.h. muvel da tut mal e dils tiers nuscheivels, sco el ha preservau gl’onn vargau.
Actum Die et Anno ut supra
P. Basilius veith Cap. Secret.
Acta Capitularia 1799-1813, pag. 95 e 96. (Notizia da pader Baseli Berther)

11

Historia da Tschamut

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img03.jpg